• 算死草高息抵押有內情|刁佬
  • 2020-06-19    

 

花天酒地要靚女,傾刁除咗靚女,點少得靚酒。話說上週星爺去本地第一大地產商家中作客,地產商出動家廚招呼之餘,更拎出陳年珍藏1982年Leroy Musigny,星爺亦都唔弱,拎出一支1995年DRC Richebourg。

轉個頭,報紙就報導星爺嘅普樂道12號「天比高」大宅,抵押咗畀美資大行摩根大通銀行,呢個物業曾經喺2011年向匯豐銀行承按,去年贖回,今次再抵押是否另有內情?

眾所周知喺摩根大通開個戶口都唔係易,抵押利息都唔會平,你估匯豐、恒生、中銀做個一按2厘幾息咩!以星爺咁精明,點解會肯畀高息?就要由刁佬三個月前嘅《江湖刁事之煙花過後》講起,四年前星爺同內地上市嘅上海新文化傳媒集團股份(300336)作出一個交易,出售星爺個人名下的電影製作之司51%股權,由於收購價為天文數字,自然要有盈利擔保,行內視之為盈利對賭協議。星爺嘅作品的潛力每部都好似Leroy同DRC嘅靚酒咁堪稱一代又一代嘅經典,而星爺本人更加係國寶咁話,有盈利保証前提下上市公司一擇13億,買斷星爺未來幾年份電影利潤。

我哋重溫一下協議:上海新文化傳媒集團股份及友好,以13.26億人民幣購入原由周星馳個人100%控股的製作公司PDAL的51%股權,星爺以PDAL的未來盈利套現十幾億,不過佢亦需要於2016至2019年間為PDAL實現不少於10.4億人民幣淨利潤,分別為2016年1.7億、2017年2.21億、2018年2.873億及2019年3.617億。

星爺過去幾年嘅作品《美人魚》、《西遊.伏妖篇》及《新喜劇之王》雖然經典不如從前,但票房仍然收得,按上海新文化傳媒集團2018年年報披露,PDAL頭三年成功實現承諾利潤,但今年星爺有咩戲出?不單止你同我都諗唔到,就算霸王硬上弓去上映,相信也很難實現2019年財政年3.617億的承諾利潤了。做唔到承諾利潤,賠錢亦都好正常。

坊間話今年電影業因為疫情停擺,行內人士手停口停,有人話星爺大洗需要按樓維持生活,亦有人話星爺因為開戲資金短缺而借錢。此言差矣,星爺知慳識儉,生活點會有問題;為開戲搞到資金短缺而借錢,更加唔可能,出名精明嘅佢,開戲一定有老闆支持,係借力打力,點會出自己錢。表面証供話畀刁佬知對賭協議到期就抵押層樓攞筆大錢,時間如此配合,很難不聯想起四年前的10.4億利潤承諾。

作者簡介:

刁佬

遊走在中環黑白之間,自覺是個穿著西裝的古惑仔,在波詭雲譎的金融市場中,鑽研刀不血刃的秘訣。


----------------------------

全新「和你撐計劃」 專享獨家禮遇 實際行動支持《壹週刊》

按此了解更多

----------------------------

壹呼百應 號召有心人 請香港人睇壹週刊

按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!