• 【禁忌之林】BNO變人生勝利組(林忌)
  • 2020-06-19    

 

十幾年前 BNO畀人笑係「小老鼠」,成日畀香港傳媒用假資料抹黑話冇用,一班旅遊達人老作 BNO 「唔係英國籍」,跟港共政府話「只係旅行證件」,甚至吹到去海外唔可以搵英國使館,作到話要人搵中國領事館;呢十年八載,幾個月就有班中共五毛出來老作,話 BNO 冇用,笑人哋申請BNO,又笑人哋爭取BNO 平權。

由2011年福島核災,英國第一時間安排BNO連埋其他英國人一齊撤離日本;到今年武漢肺炎秘魯撤僑,英國早香港四日,價錢平一大截,都總係有好多人新聞又唔睇,專信藍絲嘅假新聞假消息;結果?當英國宣佈要提供新方案,令BNO可以輕易移民英國,成班人立即大排長龍去續證,當年恥笑 BNO冇用嘅,今日提供收費文章教人續證;咩「垃X新聞」、「獨X媒體」,呢幾年多次推介五毛文章,話BNO冇用,叫人唔好「晒錢」;早兩星期仲大大聲,同大家講英國個方案係「呃錢」,話用來呃人去12個月嘅「工作假期」,咦?而家有咩聲出呢?哦,去左排續證。

十幾年來笑人哋爭取BNO平權係傻仔,爭取成功就華麗轉身去霸位,就係呢種蛀蟲,令香港爛腐到呢個地步;亦解釋左,點解今日嘅香港人,要集體移民去逃亡;今日之果,即昨日嘅孽,香港搞成咁,有好多責任就係來自遲鈍嘅人──你要去到2020年今日先續證?對中國政府咁有信心,對特區護照咁有信心,怕咩?唔使驚,要信中國政府!

97後出世嘅後生仔女,想拎都拎唔到,班當年拎左嘅,卻打死唔續證;爭取民主自由,好多人長期都無動於衷,票又唔投,時事又唔關心,一句「太政治,不了」,於是一路由香港爛。在前線打生打死,係靠班年輕人;而家要走佬,就益班有資產嘅人,合理嗎?班年輕人不停就BNO 放負,我明喎,我完全明喎,咁叫做公平咩?呢個世界公平咩?

唔係戰狼教落,話出外記得拎住中國護照,再加「回鄉證」咩?做咩藍絲都排隊拎BNO?甚至連張咁簡單嘅英文 form 都唔識填,畀8千銀搵旅行社代辦?

香港法律又唔識,英國法律更加唔知,「BNO去讀大學,點解要畀國際生學費」?答:「因為拎住英國公民護照 (BC)去,你冇通常居住三年,都一樣當你國際生。」

「車!要住滿五/六年先可以拎英國護照,咁同家庭團聚有咩分別?」

答:「英國家庭團聚有資產審查,其實香港都一樣有,只不過係單程證先冇,係班左膠日日吹到人人都唔使,你又信」

「父母冇BNO,點解唔可以跟去英國團聚?」

答:「英國本土人都唔冇話一定批老人團聚,必須證明在原居地都提供唔到足夠嘅醫療條件,而且係必須要靠你養,你第一日知?以前同歐盟嘈到拆天,就係因為歐盟公民就例外」

「英國搵食艱難,就算97前出世,後生仔冇錢點算?」

答:「中產就擔心重稅同人工低,但係屋就平香港一大截;後生仔反而最唔使擔心,因為脫歐,好多低技術工種都驚冇人做;而偏偏英國藍領人工高香港一大截,屋更平一大截,你唔好拎交通費、餐廳消費貴來比啦,學自己煮啦天才!超市就平香港一截啦!」


----------------------------

壹呼百應 號召有心人 請香港人睇壹週刊

按此了解更多

----------------------------

APP 內訂閱 《壹週刊》

1Click 搞掂 輕鬆簡便

按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!