• 【97天龍八部】李若彤手瓜起腱拖陳浩民獻唱 網民:李語嫣可一拳打低段譽
  • 2020-06-18    

 

李若彤曾被譽為「最美小龍女」,據聞連金庸都讚!其實,佢當年喺《天龍八部》飾演絕世美女王語嫣都唔差㗎,日前仲同劇中飾演段譽嘅陳浩民「重溫舊夢」,現身大陸節目合唱《天龍八部》主題曲《難唸的經》。唱嗰方面,當然無得同原唱周華健比啦。而且,重點係已經50出頭嘅李若彤,fit到漏,手瓜起埋腱!難怪網民講笑咁話:「而家李語嫣好打過段譽,隨時一拳搞掂佢。」

睇完片、聽完歌,觀眾唔太在意陳浩民同李若彤唱成點,完全聚焦喺李若彤身形之上,話佢fit過後生時,企喺闊袍大袖唔見腰嘅陳浩民身邊,簡直就係強烈對比!梗係啦,就算武漢肺炎肆虐都無阻李若彤健身成狂,佢仲會拍片放上網教人健身,堅係練到個肚有排朱古力,唔講得笑㗎,連帶個樣都回春靚晒!

其實,50歲嘅陳浩民都唔差,睇落仲係有啲𡃁仔feel,好襟老,難怪喺大陸拍劇,男主角長做長有。當然,識得氹中國人開心、開口埋口都離不開中國,或者先係成功要素。無耐之前,佢先同黃一山,亦即《逃學威龍》入面嗰個黃小龜同學一齊拍短片「歌頌」中國人身份。片中,黃一山扮偶遇陳浩民,問佢係陳浩民、哪吒、孫悟空定係濟公?陳浩民一一否認,再用堅定語氣答:「中國人!」真係「滾動」到打晒冷震起埋雞皮。

+9


----------------------------

全新「和你撐計劃」 專享獨家禮遇 實際行動支持《壹週刊》

按此了解更多

----------------------------

壹呼百應 號召有心人 請香港人睇壹週刊

按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!