• 【TVB力邀選港姐】長女苗彤性感入娛圈 苗僑偉:佢唔想同我個名黐埋一齊
  • 2020-06-19    

 

大台劇《飛虎之雷霆極戰》未播完,第三輯已經準備開拍,61歲但依然型爆嘅三哥苗僑偉做到無停手。虎父無犬女,佢29歲大女苗彤原來都加入咗演藝行列,喺加拿大發展。點解唔考慮TVB?三哥話:「個女唔想同我個名黐埋一齊。」

苗僑偉同戚美珍嘅長女苗彤,絕對係型格美女,而且無不吝惜,經常喺社交網站大晒性感靚相,難怪有傳TVB睇中佢並曾力邀參選港姐,但據聞當時苗彤醉心攝影,又同同學仔創立工作室追夢,所以請TVB食檸檬。

估唔到,苗彤唔聲唔聲原來已經入咗娛樂圈,喺加拿大從事攝影和拍戲工作,有拍電視、電影,亦有到台灣拍旅遊節目。呢點,得到佢老竇苗僑偉認證:「佢喺外國都有做(演藝),佢有演出嘅。」

既然有意做藝人,點解唔返香港呢?以佢父母人脈,幫手鋪橋搭路,易行好多喎,何況苗僑偉都話加拿大發展唔易!原來,同外型一樣,苗彤好有性格,自信且獨立,連事業都靠自己,拒絕父蔭,苗僑偉說:「暫時佢都鍾意喺嗰邊,佢好有信心自己會一路去表演。返嚟(香港),佢話唔多唔少會受我影響,佢唔係好想,唔想同我個名黐埋一齊。」咁有無睇過個女作品、有咩評價?「嗰啲西人文化嚟㗎喎。」似乎老竇苗僑偉唔多識欣賞。

前世情人唔黐身、鍾意開心share好身材,似乎仲有啲文化差異添,但苗僑偉睇得好開:「無辦法㗎喇,我哋好似佢嗰個年紀都係一樣自己顧自己,點會理父母點睇係咪先。」其實feel到佢點都有啲感慨,唔係又點會每當個女post舊時BB相,就9秒9畀Like兼留言話「好得意,畀返(舊時)呢個樣我」呢。但,苗彤嘅回覆係:「飲返十杯八杯就可以畀到呢個樣你。」女大女世界,唔再係手抱BB,苗僑偉都坦言懷念仔女細個時:「個個父母都係㗎啦,都係覺得自己啲細路仲係BB嚟。不過控制唔到呀呢啲,明唔明呀,好大個㗎喇,佢有佢自己自由。」

苗彤喺加拿大,任職電腦設計、遺傳了三哥高大身型嘅26歲細仔苗俊亦身處外國同富二代女友打得火熱,老婆戚美珍同樣身在外地陪仔女,苗僑偉一支公,父親節斷估無著落,除咗工作。「我自己喺香港過。如果休息放假,我咪過去同佢哋過囉,但今年我要喺度開工。」加上武漢肺炎影響,想一家團聚真係唔容易。

+8

26歲兒子苗俊

300445,300446,300447,300448,300449,300450,300451


----------------------------

全新「和你撐計劃」 專享獨家禮遇 實際行動支持《壹週刊》

按此了解更多

----------------------------

壹呼百應 號召有心人 請香港人睇壹週刊

按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!