• 【禁忌之林】亂世批鬥佳人(林忌)
  • 2020-06-12    

 

呢半年來好多人都想問,究竟個世界發生咩事?點解歐美各國可以堅持唔戴口罩,防疫亂龍搞到武肺大爆發?點解世衛搞到咁衰款,中共野心咁明顯,四處恐嚇各國,都仲有咁多人幫佢哋講好說話,或者只係求其講兩句「呼籲尊重一國兩制」,其他人去晒邊呢?佢哋關心乜野呢?

先有英國示威者拉倒三百年前國會議員Edward Colston像,理由話佢曾經工作嘅公司,涉及非洲嘅黑奴貿易;再有人在二戰時英國嘅著名首相邱吉爾像上塗鴉,刪除佢名字寫種族主義者 (racist);呢一幕係咪似曾相識?就好似當年在中共批鬥孔子,全國摧毀萬世師表嘅像,指控佢思想係「維護奴隸制」嘅「文化大革命」一樣,完全解釋晒左癌係時空錯亂,唔單止在中國會製造文革,在西方都一樣會製造文革,思覺失調到黐晒線,下鋪係咪捉晒所有婦女平權之前嘅男人出來批鬥,攻擊佢哋係性別主義者 (sexist)?

聲援在美國遇到警暴嘅黑人,應該;聲援警察暴力,合理;希望地球減少種族歧視,冇問題;但係硬係有班左癌上腦嘅左膠,把成件事膠化到令人反感。歷史就係歷史,當年嘅道德、社會規範都同今日唔同,點可能用今日嘅標準,去追溯過往?用相同標準,所有歷史上嘅君王都係獨裁者,所有將軍都係屠夫,呢種無限上綱嘅手法,完全就係當年毛澤東批鬥「封建主義」嘅翻版;又反過來諗,點解國際上唔少左膠對中共惡行,係視而不見默不作聲,原因就係佢哋嘅思路,其實一直都好接近。

然後就輪到一大堆電影、電視片集,例如最著名嘅經典奧斯卡電影亂世佳人 (Gone with the wind),竟然被指控「美化奴隸制度」,而被HBO停播。一套1939 年嘅電影,講述嘅係美國南北戰爭時期 (1860-1870年代)嘅歷史舊事,南方亡國嘅莊園農夫,被「北佬」戰勝後嘅資本主義衝擊,緬懷往昔Good old days,咁又鼓勵奴隸制度?個故事講亡國後黑奴繼續跟主人搵食,咁又唔得?用同樣標準,所有華人嘅宮廷劇都應該全部包膠,打警告字眼以禁晒佢,太監、宮女、後宮娘娘、纏足扎腳、一夫多妻,全部都係鼓吹奴隸制度、性別歧視、歧視變性者,應該全部加以限制!啊,全世界有個國家,好適合佢哋住──中華人民共和國,上年起搞左個「限古令」,當日中共黨媒批鬥古裝劇「美化帝王臣相」,就同今日班國際左膠一樣,以政治正確為名,打壓藝術與創作自由。

最荒謬嘅係,當年熱衷以道德審查創作嘅,係班道德塔利班──宗教右膠,例如話內容淫邪有傷風化,當年班左翼就大大聲撐藝術創作自由,反對道德審判;今日個世界就完全顛倒,倒轉由班左膠來做道德審查會,批判呢樣政治唔正確,果樣宣傳錯誤訊息,再次證明無論左右,膠到盡頭都係支持極權暴政。

對香港人來講更諷刺嘅,就係《中國國歌法》與「港版國安法」魔掌正伸入校園,教育局局長一時又話唔可以唱《願榮光歸香港》,一時又話唔應該唱《孤星淚》,對試卷對教師搞文革2.0,借審查來作政治打壓,偏偏人權應該優先,自由比起道德規範更重要呢一點,卻仲有好多本地左膠唔願意明,唔明白凡有審查,就會有錯誤;凡有道德審判,就必會打壓自由!個問題唔係個界線合唔合理,唔係嚴唔嚴嘅問題,而係根本唔應該有。


----------------------------

壹呼百應 號召有心人 請香港人睇壹週刊

按此了解更多

----------------------------

APP 內訂閱 《壹週刊》

1Click 搞掂 輕鬆簡便

按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!