• 【造星II最被期待出道】MC張天賦怕被拖慢 拒簽ViuTV:自己開工作室
  • 2020-06-13    

 

ViuTV節目《全民造星I》令姜濤人氣急升,更成為ViuTV少有的「明星」。《造星II》亞軍MC張天賦同樣搶鏡,但他堅拒跟ViuTV簽約,坦言怕旗下男藝人多,會拖慢發展。

「我冇同任何公司簽約,因為希望可以自組工作室,繼續做自己嘅音樂。」他說。

驚簽ViuTV有排等

網民指要數《全民造星II》最被期待出道的,非MC莫屬。但比賽完結超過半年, MC仍未有新搞作,皆因遇上疫情,打亂了他的計劃。

「本來希望有啲作品可以發表,但咁啱遇上疫情,一切都遲咗。半年過去,我冇同任何公司簽約。一來ViuTV已經簽咗唔少好有質素嘅男歌手,又擁有一隊男團組合,呢啲的確會影響自己往後星途!同時簽約後會我比較被動,一來我會覺得缺乏安全感,二來亦會擔心如果我咁被動嘅話,會唔會被拖慢,或者唔係自己理想中嘅理想狀況!」他坦言。

言下之意,是擔心很久也未等到自己出Solo歌的機會。「可以咁講,呢個係我非常擔心嘅原因!」

唔怕公司小器

說到底,MC也是因為ViuTV而被人認識,會否擔心不簽約,ViuTV會小器?

「其實坦白講,佢哋會唔會小器呢個問題,我從來冇想過,剛才講過佢哋已有一班好厲害嘅男團,亦有唔少質素好好嘅男歌手,所以我認為,唔會因為我唔簽約呢個舉動,而變得小器。」

MC現有不少翻唱歌在網上分享,他說很快便會正式出道,「唔簽公司呢個決定,就係因為希望自己可以去做呢件事,之後會有自己嘅工作室,亦會推出新歌。」

向亡父許下承諾

一步一步走出自己的路,MC總算爭一口氣,沒有辜負亡父的期望。去年比賽期間,爸爸未能看到他獲獎便離世。

「知道爸爸有呢個病時,已經做好心理準備,我覺得必定會有傷痛,係咪放低只係其次,反而最重要係我認為爸爸喺某個地方,同樣會見我喺《造星》嘅成就。依家發展嘅事業,佢亦一定會支持我!爸爸臨終前,我其實向佢許下好多承諾,與其放下傷痛,不如去做好呢啲承諾,做番一次乖仔畀爸爸睇。」

無悔公開戀情

雖然他有不少女粉絲,但卻表示無悔公開戀情。

「我從無後悔公開女朋友,一來覺得必須要對Fans或外界坦白,只要呢段感情係健康同穩定,其實或多或少可能更會帶來好處。我亦唔想瞞騙fans,因為現在網絡世界太發達,坦白講就算要呃都唔可以長久,所以我認為坦白講出嚟,總好過偷偷摸摸時被人影到!」

原來MC是個浪漫情人,提到為女友做最窩心的事,他說:「情人節時,我喺女朋友屋企樓下,以蠟燭堆砌咗一個心心,然後自彈自唱送一首歌畀佢,但其實已經係幾數年前嘅事,之後已經冇做過。」

----------------------------

APP 內訂閱 《壹週刊》

1Click 搞掂 輕鬆簡便

按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!