• 【Son話教育】未返工都要賠代通知金?(張慧敏)
  • 2020-06-08    

 

最近連登有人出Post,簽咗僱傭合約不過未正式返工,期間又搵到另一份更好條件的新工,當然想唔做,通知對方結果被要求賠償辭職代通知金,唔知點算好,問大家最壞情況要負上什麼法律責任。當然眾說紛紜,都唔知信邊個好。

如果工作有試用期,試用期內頭七日決定唔做只需要一日通知,試用期內頭一個月決定唔做,就七日通知。通知期是雙向的,即是僱主解僱或是員工辭職,做法一樣。但要留意的是,不是所有工作都有試用期的,有些僱傭合約一開始就訂明是正式員工,第一日返工就唔做,都要一個月通知或更多。但這種合約並不常見,主要是一些特殊職位很難請人,所以用這種條款為公司爭取時間,萬一員工辭職唔做都有時間搵替代人。但當然有辣有唔辣,因為一開始就是正式員工的話,所有公司的福利包括醫療及各項津貼等,一上班就要即時生效。

但連登那個Post所講的情況是根本未正式返工,不過僱傭合約生效期由簽約的那一日開始計,除非薪金亦由同一日開始計算,否則即使簽了約但上班日期之前決定不做的話,公司憑什麼、又根據什麼要員工賠償代通知金。僱傭關係的基本,就是一個出力一個出錢,但一個從來未出過力,另外一個亦從來未出過錢,僱傭關係根本不能成立,未曾正式上過班根本未曾是員工,點告違約?

成件事擺明就是詐騙,怎麼可能簽一份日後上班、不過即時生效、未曾上班就定明代通知金及Last day通知期的 Employment Letter?不過原Post講啲唔講啲,當中的來龍去脈、什麼行業、什麼工作,完全未有提供,我只能按常理常識嘗試拆解。

至於過冷河期間接受新工作,是否需要賠錢給舊公司?那就不只是賠錢咁簡單,是違約即是要付法律責任,舊公司有權循法律途徑起訴舊員工。不過大前提是,過冷河期間,公司依然有照出人工,否則不能成立。

雖然近日經濟下滑再加疫情肆虐,很多打工仔心急搵工作,但都要非常小心,免得跌入陷阱,搞不好分分鐘賠了夫人又折兵,還要嚇餐死!合約不可以亂簽,一定要睇清楚條款,有問題有疑惑一定要問清楚,有權要求帶回家慢慢睇完才簽。不要一時心急,是但求其簽,簽完之後才知中伏。不過即使中伏,一定要尋求法律意見及途徑解決,不要怕事啞忍,令立心不良的僱主騙徒得逞。

撰文:張慧敏

張慧敏 (Alison),人稱 Son姐,從「獵頭女王」成功轉型成為商企顧問公司CEO,由始至終的專業是憑一對慧眼看盡職場大小疑難雜症。正職是一對兒女的母親,從自身挫折和經驗悟出教養之道,不外乎以身作則。

個人Facebook 專頁


----------------------------

壹呼百應 號召有心人 請香港人睇壹週刊

按此了解更多

----------------------------

APP 內訂閱 《壹週刊》

1Click 搞掂 輕鬆簡便

按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!