• 【禁忌之林】撐黑人不怕蝕人民幣|林忌
  • 2020-06-05    

 

近日有班消失左成年嘅香港偽人,紛紛上網打卡,支持美國因警暴喪失嘅黑人George Floyd;好多香港人感到好氣憤,問一條好簡單嘅問題,就係點解香港警暴佢哋就唔出聲,但係美國呢單案,相關警察立即被撤職與起訴嘅警暴,卻紛紛爭住抗卡出聲呢?答案好簡單,撐香港人會損失人民幣,中國會恐嚇你,會失去中國市場;撐美國黑人,既唔會損失美金,美國唔會恐嚇你,更唔會失去美國市場,點同呢?

最令人失望嘅,當然要數英超球會利物浦;1989年嘅希斯堡慘劇因警察控制失當慘死96人,事後警察講大話,加上小報老屈利物浦球迷係慘劇嘅起因,令死難者含冤廿幾年才得到昭雪;上年香港利物浦球迷會譴責香港警暴,竟受到英國球迷會嘅警告,甚至威脅要剔除官方球迷會嘅身份;近日利物浦就高調撐美國被警暴殺害嘅黑人,球員更單膝跪下,為 George Floyd 悼念,原因是甚麼?大家都心照:因為撐香港人會失去人民幣,撐美國黑人不會失去美金。

的確好多時聲援或者唔聲援,例如有班左膠成日問點解關心香港,唔關心敘利亞之類,有更多可以解釋嘅原因 1. 關係遠近 2. 是否容易引起共鳴 3. 該事是否會引起討論──舉例,在非洲餓死人唔係新聞,在香港餓死人就係;但係更令人憤怒嘅原因,就係往往呢種雙重標準嘅,係用埋呢幾個理由,都無法幫佢兜!例如一堆「香港偽人」在IG打卡譴責美國警暴,請問香港警暴點解唔關心呢?唔講反送中嘅「政治」,早排有位南亞人在香港,同樣因為警察武力膝壓而死,點解唔關心呢?就當佢哋特別關注黑人,唔關心南亞人,咁早排廣州大規模歧視黑人,佢哋又點解唔關心呢?你屋企四級火唔關心,關心人哋燒傷手指?當人哋政府立即回應,捉晒班殺人警察,控告埋謀殺罪,你就爭住打卡關心?冇嘢呀?

當你幫佢用晒所有辯護,都搵唔到理由,答案就顯而易見:就係有班人平時扮正義,實際上係極度虛偽;當然虛偽就係人性,因此怪人虛偽係冇意義嘅;但係用返「左膠」成日提在口邊嘅「公義」來追問,點解世界上可以有國家可以打橫來到呢個地步?點解有個國家可以令到一班自命正義、平等、公義嘅人士,選擇性失明到呢個地步?點解全球其他國家,以至正義嘅力量,對於最大嘅邪惡政權,可以坐視不理,以至任佢哋欺負大家?2020 年嘅地球,與 1930年代嘅地球,相差接近一百年,點解仍然犯緊相同嘅歷史錯誤?我哋呢班自命公義,自命人權進步嘅人,點解仲衰過上世紀30年代?姑息中國,與姑息納粹德國,本質又有咩分別?

最悲哀嘅,就係好多自命「進步」嘅朋友與政黨,面對全呢種邪惡政權,愈係唔敢出聲;理論上最重視人權嘅歐盟,發言人竟然講制裁(中國)冇用;紐西蘭工黨政府,唔簽五眼聯盟其餘四個嘅聯合譴責中國聲明;加拿大執政自由黨、新民主黨、綠黨,投票否決保守黨要求在「加中關係特別委員會」, 討論「港版國安法」;好在英國工黨終於轉了黨魁,不再由「大左膠」郝爾彬擔任,否則大家一定會擔心BNO平權議案,會否好似90年代英國工黨否決港人擁有居英權咁,由呢班口口聲聲支持基層與反歧視人士,聯合保守黨內反移民嘅後座議員一齊否決。

正係多年來大家對最大嘅邪惡視而不見,有班友仲幫佢哋吹話冇資格「干涉別國內政」,最後嘅苦果,就要大家來承受。一場武漢肺炎,終於叫醒好多自私精,你以為縱容邪惡係冇代價?代價就係要大家齊齊承受。


----------------------------

壹呼百應 號召有心人 請香港人睇壹週刊

按此了解更多

----------------------------

APP 內訂閱 《壹週刊》

1Click 搞掂 輕鬆簡便

按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!