• 【Son話教育】Work From Home大趨勢(張慧敏)
  • 2020-05-25    

 

先前睇新聞知道Twitter宣布所有員工以後唔使喺辦公室返工,全部改為work from home。即時反應是,這些機會不會屬於香港人,因為咁前衛、咁有遠見嘅老闆我以為香港冇。直到9GAG宣布正式撤出辦公室工作模式,這個決定不單止英明,簡直樹立新典範,我甘心自摑嘴巴心服口服。

其實現在的辦公室工作模式,根本完全脫節過時。工廠模式要靠機器每個小時生產幾多件貨,當然一定要返工坐定定先有生產力。如今科技發達到一個點,只要揸住部手提電話,等同揸住部電腦,流動數據快又準,仲要無限上網!工作根本不需要局限在特定地點才能進行。

只可惜能夠與時並進的老闆,甚至管理層,實在少,員工不在辦公室工作,就好像不在工作一樣,覺得員工很着數、公司很蝕底。大話怕計數,公司上下咁多員工日日坐在辦公室,究竟有幾多個小時真正是在辦公?不要計每日舟車勞頓上班下班的時間,食早餐午餐下午茶,幾點食、去邊度食、食乜嘢,都花了不少時間。等呢個、等嗰個、等開會,又等了不少時間。等領導人發表講話、等高層拍板做決定,等完一日乜都冇做過。

還有老闆依然抱着準時放工等同搵公司笨的原則,你有張良計我有過牆梯,員工自自然然就會拖長工作來做,同大家鬥長命。勞民傷財莫過於此!

隨着近年Business Center越開越多、成行成市,Mobile Office流動辦公,大大減低營運成本亦更加有靈活性,是大勢所趨。其實企業需要精簡人手,根本不需要花錢搵顧問公司或者搵人事部做醜人,員工的工作能力和貢獻,Work From Home即見真章,無所遁形、一清二楚。

即使從生理角度來說,每個人的作息時間、生理時鐘都不一樣。有些人越夜越精神、效率越高、創意越澎湃。有些人像我習慣早起,寧靜清晨最能集中精神。千篇一律的朝九晚五,根本不可能適合所有人之餘,廿四小時WhatsApp、Email不停,employment contract寫的返工時間完全沒有約束力和指標。

有什麼公平得過薪酬花紅升職,是根據工作量、效率和準繩度來計算?有甚麼不公得過日日坐定定扮工的,比埋頭苦幹的搵更多、升得更快?

個個老闆都想請人才,有幾多個識得分辨及懂得留住真人才?未來聘請新趨勢,員工最關心的,不會再是幾多福利幾多大假,是Work From Where,立此存照!

撰文:張慧敏

張慧敏 (Alison),人稱 Son姐,從「獵頭女王」成功轉型成為商企顧問公司CEO,由始至終的專業是憑一對慧眼看盡職場大小疑難雜症。正職是一對兒女的母親,從自身挫折和經驗悟出教養之道,不外乎以身作則。

個人Facebook 專頁


----------------------------

壹呼百應 號召有心人 請香港人睇壹週刊

按此了解更多

----------------------------

APP 內訂閱 《壹週刊》

1Click 搞掂 輕鬆簡便

按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!