• 【11月娶富貴何雁詩】前星夢一哥無工開 準駙馬鄭俊弘轉揸波子陪掃貨
  • 2020-05-18    

 

袁偉豪與張寶兒近日聯名買入6500萬清水灣豪宅。隨即被大肆報導,指袁偉豪靠有米女友升呢。

其實,現年36歲的鄭俊弘(Fred),情況與袁偉豪差不多,都予人「夫憑妻貴」的感覺。11月即將迎娶富家女何雁詩的Fred,為符合富貴駙馬爺身份,由昔日揸日產車,升呢揸波子,仲唔係夫憑妻貴?不過架波子2011年出廠,二手價只是40萬左右,就算Fred最近無乜工開,但搵架二手波子充撐下場面,應該唔算吃力啩。



普通家庭出身的Fred,舊時代步的只是平價日產車。相反,富貴女友何雁詩揸寶馬,更試過買支紅酒都出動瑪莎拉蒂,好一對貧富懸殊的戀人。

二人並非門當戶對,加上人人都知Fred個底花,所以傳聞何爸爸本來唔鍾意Fred,直到後來改觀仲公開讚:「呢個男仔幾好,又唔多聲氣,覺得佢幾孝順。」

得到何爸爸接受,亦就快榮升駙馬,Fred當然要學吓大台口號,「全力以赴,做到最好」啦,所以早前何雁詩與女友人相約見面,Fred keep住未來外父口中嘅唔多聲氣形象,何況女人堆搭唔到嗲,但都一於抆衫尾跟實何雁詩出入。

一行人在露天茶座傾完偈轉移陣地時,Fred與何雁詩十指緊扣揈住手並肩而行,看來相當幸福,何雁詩更有幸福肥痕跡,特別是下半身hip位,脹卜卜有啲肥腫難分。問題或者出喺好蝦人著的五分單車褲,駕馭到就腳長顯瘦,駕馭唔到就成個何雁詩咁……唔緊要,Fred依然好愛好愛她,在超市購物時也甘做阿四,推住手推車默默跟在何雁詩身後,就似家傭姐姐跟著阿Mom去買餸咁上下,最後做埋司機揸波子管接送。



Fred 2013年憑《星夢傳奇》爆紅時,他在TVB捱了十二年、月入低見六千元的辛酸史被大肆宣揚,還要靠遠在加拿大的母親接濟,連母親都建議回加拿大當差好過。不只,未紅時的Fred更被媒體影到,與當時女友姜麗文以及秦沛到餐廳下午茶,拿出銀包埋單的是秦沛。貧困潦倒形象從此深入民心!

相反,何雁詩未出道已是有錢女架勢,參加《超級巨聲》已有司機專門接送,然後才知她有個開物流公司的富爸爸,家住市值約5000萬的大埔滌濤山獨立屋。身為獨生女的她,深得爸爸寵愛,細細個6歲已被培養上流運動打golf的興趣,2014年22歲已用850多萬買入奧運站浪澄灣物業,現價已升至千三萬,相信都是富爸爸愛的饋贈。

Fred與何雁詩,差天共地,何況負面新聞一單接一單,包括成名後即撇陪佢捱窮的姜麗文。就算與何雁詩相戀後,又收埋拍拖3年的未婚妻阿Beebs,更傳出攬啜爆乳女模Bebi,還有懷疑虐狗事件,葬送了「星夢一哥」地位,幾乎變成聲名狼藉。

幸好,何雁詩仍是不離不棄,連何爸爸也開綠燈批准Fred升呢做駙馬,真係要學煲呔曾(曾蔭權)講返句「做好呢份工」,日後莫講話二手波子,隨時可以揸住勞斯萊斯、賓利、法拉利,成為何雁詩的御用「柴可夫司機」都仲得。

攝錄:陳亦龍

----------------------------

壹呼百應 號召有心人 請香港人睇壹週刊

按此了解更多

----------------------------

APP 內訂閱 《壹週刊》

1Click 搞掂 輕鬆簡便

按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!