• 【禁忌之林】感謝日本侵略中國嘅漢奸(林忌)
  • 2020-05-15    

 

「感謝日本侵略中國」──呢句話邊個講嘅?漢奸,賣國賊,走狗,佢叫做毛澤東,個樣印在天安門廣場城牆上,以及在中國嘅人民幣上面,出處係中國外交部與中共中史文獻研究室,所合作編寫嘅《毛澤東外交文選》,1994年版,第438頁。

呢個世界最好笑嘅,就係求其你在 Google 都可以搵到親共「巴乜的報」於2019年7月29日,「習系」嘅多維新聞網於在2018年10月25號,大公網於2014年5月29號,都一再有專文去幫毛澤東「解釋」,點解佢要多謝日本侵華,這些由中共自行承認,再由中共自行辯解嘅事實,落在一班不學無術,弱智兼可笑嘅港共五毛手上,居然可以反過來鬧考評局嘅問題係「不當言論」──有咩不當呢?不當得過中共日日崇拜嘅毛澤東?

考評局試題──「1900-1945年間,日本為中國帶來的利多於弊」?條問題係開放討論,而且擊中要害──毛澤東又多謝日本,當年孫中山又以滿蒙來勾結日本,問題出得咁好,居然被文革批鬥,其實只係反映了一項事實,就係香港已經變成非人居住嘅地方。

1900年嘅「中國」,根本只係地理名詞;遲至1905年孫中山在日本東京,創立同盟會,其口號為「驅除韃虜,恢復中華」,非常清楚嘅,就係當年嘅所謂「中華」,代表嘅只有漢人,孫中山係要創立一個漢人嘅民族國家;光復會嘅陶成章,在1904年嘅《中國民族權力消長史。敘例》寫:「孰為中國人?漢人是也;中國歷史者,漢人之歷史也。」而滿清、蒙古、新疆與西藏,就根本不被當係「中華」嘅一部份,當時又從何而來乜嘢「中國」?

更好笑你要問嘅,就係當年孫中山點解要在東京來創立同盟會,而唔係北京呢?唔止毛澤東要勾結日本,孫中山同樣係勾結日本,如果冇日本,請問去邊度建立同盟會?去邊度勾結外國勢力搞革命?

點解日本人願意幫忙?因為孫中山多次向日本承諾,事成後滿洲與蒙古畀日本,原因好簡單,就係當時嘅革命義士,認為漢人才係中國人,滿洲人並唔係中國人,連武昌起義革命軍旗都係「十八星旗」,代表漢人居住嘅十八省;因此當初革命黨人當初嘅目標,係要十八省漢人脫離滿洲殖民者嘅統治而獨立,因此孫中山向日本多次講:「滿蒙可任日本取之,中國革命目的在於滅滿興漢,中國建國在長城以內,故日本亟應援助革命黨」。

用中國人平日最愛用嘅「全靠中央政府」邏輯──「要不是日本政府照顧你們,中國,完蛋了」──全靠日本保住班革命黨人,才有能力去搞革命推翻滿清帝國,去建立中國;冇日本,根本連「中國」都冇,偏偏事後有「中國人」走數,唔肯割滿蒙,唔肯認廿一條條款,把戰後巴黎和會承諾割畀日本嘅德國租界,都認為自己老奉宣左戰,就要日本親自派軍隊打落來嘅地方雙手奉上──而且仲要係日本仔出兵趕走德國佬之後,見人哋打輸左,所謂「中國」才對德國宣戰,然後就要老奉搶人哋出兵打落來嘅戰利品,你當人哋傻的嗎?列強當然睬你都傻!

搶輸左,就厚顏無恥竄改歷史,就話「老祖宗」、「自古以來」嗰度屬於你,因此你後來才建國,你後來才從滿洲人手上獨立,仲要係收左人哋錢來搞獨立,就倒轉來屈人哋係邪惡──以「中國邏輯」,滿洲人統治過中國,因此滿洲是中國嘅;蒙古人統治過中國,因此蒙古是中國嘅;滿洲人統治過西藏,同時統治中國,因此西藏也是中國嘅;同樣蒙古統治過基輔,統治過俄羅斯,佔領過匈牙利平原,因此所有蒙古統治過嘅地方,由東歐到印度,都全部係屬於「中國」嘅。

話說回頭,翻譯與輸出了國族主義(民族主義)嘅精神病畀中國,可謂係日本對中國最偉大嘅「貢獻」,把強佔人哋地方,強吞別人民族,強迫他人做中國人,變成「中國不可分割嘅一部份」,甚至係「中國人思想」中「不可分割嘅一部份」。

一講起「乜獨」就會上腦,一講起日本就會跳掣,一講起咩帝國主義鴉片戰爭,就好似食左過期春藥而思覺失調,然後對上述孫中山、毛澤東嘅歷史,視而不見,不願相信,再作全盤否定,或者搵堆藉口夾硬去「解釋」,你以為中毒嘅只有「小粉紅」與「五毛」?根本成班「中國人」,都全部被洗晒腦。

2020年嘅香港,就係唔可以講真話。甚至唔配合佢哋講大話,都會被中共產追殺。


----------------------------

壹呼百應 號召有心人 請香港人睇壹週刊

按此了解更多

----------------------------

APP 內訂閱 《壹週刊》

1Click 搞掂 輕鬆簡便

按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!