• 【怕被消失仍要發聲】鄭敬基送歌寄語波哥 暗嘲林鄭兒子唔知老母心水
  • 2020-05-11    

 

昨日母親節,一直為「手足」發聲,撐逆權運動的鄭敬基網上舉行《無親節快樂》live騷,穿上印有anti-hopelessness字樣的黑色白字T恤,一開波先嗌:「五大訴求,缺一不可」口號。

佢先後唱出夏昭聲當年六四悼念歌《媽媽我沒有做錯》,及撐年輕人的銀髮族葉德嫻《赤子》,並說希望有日可以請Deanie姐上嚟。

昨日發生13歲義工記者被捕,開騷的鄭敬基引述對方一番話:「希望將自己見到嘅嘢報導畀大家聽……我係做緊報導,警察做緊嘢,大家都斯文啲就得嘞。」

除13歲男童,昨日多名年輕人亦被濫捕,他有感而發:「依家年輕人處於咁危險情況,只希望一啲巨星,影帝影后能夠為佢哋講一句,能夠幫嘅點解唔幫……你(警察)已經拉咗佢,就唔好再用武力,你可以執法,但唔應該濫暴。」他指自己同王喜等人其實都擔心有朝一日被消失,但仍堅持發聲,「你哋肯講一句,不讓佢哋消失,呢個就係善。」

上月鄭敬基為紀念哥哥(張國榮)舉行網上實驗音樂夜,席間以一首《儂本多情》,送給沒跟另一半拍掌唱國歌的「勇武」波哥,歌詞:「我渴望自由讓我衝天飛,當初的我太衝動……」、「如你共我心不相同,一生愛情都白送。」

昨日母親節,鄭敬基繼續送歌俾波哥聽,因為他被阿娥在fb,分享收到橙色公事包做母親節禮物後的一句:「雖然橙色不是我的至愛!」而觸發,鄭敬基說:「疫情過後,相信好多家庭都好想一齊去旅行,但有咩家庭去旅行時會喊?好少仔女唔了解媽咪鍾意咩顏色,代表波哥送俾另一半,呢首歌《人在旅途灑淚時》。」

此歌其中歌詞:「前路渺茫請君三思,問你可曾心生悔意…..」,抵死的他為對方改歌詞:「心中有約誓永難移,『唔』期望有日相會時。」

他亦以盧業媚歌曲:《為甚麼》「在目前如何風光,仍是泥中葬」,他解釋:「我覺得無論咩人都好,如果一個人識得後悔,佢會做嘢唔同。」,他事後引用聖經說:「人若賺得全世界,賠上自己的生命,或者甚至別人生命,咁仲有咩可以換取生命呢!」

昨晚鄭敬基網上開騷,撐「手足」同時,不忘送首歌俾波哥,藉歌寄語。
送畀阿娥另一半「波哥」嘅歌,係《人在旅途灑淚時》。
自稱香港之母嘅阿娥,昨日喺fb分享母親節禮物,有句重點,自己睇,唔多講。

----------------------------

APP 內訂閱 《壹週刊》

1Click 搞掂 輕鬆簡便

按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!