• 難忘童年被屈偷嘢 王梓軒冧歌𠱁媽咪
  • 2020-05-10    

 

今日係母親節,身在洛杉磯嘅王梓軒雖然未能返港同媽媽慶祝,不過孝順仔梓軒又點會零表示呢!佢同老友Jon Ong聯手翻唱咗Ben Folds嘅〈Still Fighting it〉,個MV仲有兩段童年時同媽媽嘅珍貴片段,好溫馨!



梓軒話:「點解會揀呢首歌送俾媽媽,因為首歌係講父母對小朋友嘅期望同愛,長大從來都唔容易,家長會同小朋友一一面對,歌者好期待小朋友長大可以睇番轉頭,笑住回顧,首歌令我有好多聯想,令我想到媽媽喺我成長過程中嘅教導同愛護,同埋呢首歌好好聽,配合埋喺《梨泰院》個劇度再出現就特別好聽,亦都令到我諗起依家好困難,但我哋都可以展望未來,繼續追尋夢想。」



梓軒憑歌寄意,「我喺美國,今年唔可以同媽媽慶祝母親節,以往會陪佢食飯、送花,但今年送呢首歌畀佢就更加有誠意,我亦委任咗細佬多啲照顧佢。」



談及MV中的童年片段MV,梓軒話:「我細個都幾百厭,有一次我去機鋪打機,唔係好壞嗰啲,類似乜乜樂園,打到咁上下就嚟冇命,手快快攞咗隔離小朋友啲代幣嚟救命,個小朋友好大反應話『偷嘢!偷嘢!』我真係冇心嘅,我即刻還番俾佢,佢唔要仲即刻告狀,叫爸爸媽媽嚟,當然我阿爸阿媽都要嚟啦!我好深刻嘅就係當時阿媽冇喺人哋面前鬧我,仲維護我話『一定係誤會,我個仔唔係咁!』而返屋企嘅車程亦都唔出聲,但一返到屋企就真係嚟料喇!我嗰時得12歲,依家都歷歷在目!」

今日係母親節,身在洛杉磯嘅王梓軒雖然未能返港同媽媽慶祝,不過孝順仔梓軒又點會零表示呢!
孝順仔梓軒同老友Jon Ong聯手翻唱咗Ben Folds嘅〈Still Fighting it〉,個MV仲有兩段童年時同媽媽嘅珍貴片段,好溫馨!
每年母親節,梓軒都會送花俾媽媽,今年因為唔喺香港,所以同Jon Ong一齊jam番首《Still fighting it》做母親節禮物。

----------------------------

APP 內 1-Click 訂閱 《壹週刊》

按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!