• 不諱言談社會問題 Ben Sir讚林鄭政府聰明:派重用口罩叫有一絲安慰,雖然遲
  • 2020-05-11    

 

社會運動加上武漢肺炎疫情,香港人生活受影響,Ben Sir歐陽偉豪也不例外,很多工作都被叫停,像是大台《Ben Sir睇樓團》遇封關,日本唔去得,馬來西亞唔去得,唯有自己搵啲嘢搞,堅持每日做平板支撐,片走肥膏順便練埋紀律,最近亦忙於音樂劇《我們的青春日誌》,話綵排時大家都好聽話,「戴晒口罩咁做,導演好擔心唔知有冇表情」。

音樂劇斷估需要延遲,Ben Sir就與兩位年輕人,在戶外茶座飲返杯,期間一直雞啄唔斷,看樣子似是音樂劇的拍檔,正在交換意見、討論演出細節。

散席後,Ben Sir稍稍採一採礦,再迤迤然戴上綁帶式口戴,離開時還與《壹》仔聊了兩句,例如關於放寬限制措施,Ben Sir說:「放寬咗好過唔放寬,最好就早啲放寬晒。」他還讚林鄭政府聰明:「覺得佢都幾聰明嘅,四個去到六至八個,啲受影響行業慢慢復甦咁樣,起碼俾咗個次序出嚟。(放寬慢咗啲?)快唔快都要睇返個疫情,學專家話齋都要跟返科學。不過你知啦,可能都有啲藝術成份係入邊,我諗科學以外嘅因素佢都擺咗落去。」

相信大家都知道,Ben Sir不諱言,不時評論社會情況,像是政府派可重用口罩,他表示「會攞返個,叫做有一絲絲安慰,雖然遲咗啲」。

其實,Ben Sir有打大台工,又作為教育工作者,「發聲」,不怕被人指指點點影響工作嗎?他卻認為沒什麼影響:「照計教育界係脫離政治嘅,而家近幾年先好似樣樣嘢黐埋一齊。」舉個例,一個2009年按教育局指引設計的幼稚園認字教材,將警察與狗隻配圖教「狗」字。據知當年適逢警犬隊成立60周年,才這樣制定並沿用多年。今日,同一教材,竟被質疑針對警察,教聯會主席黃錦良又認為無謂用警員圖畫。誠如Ben Sir所言:「我就冇話從政治角度睇嗰啲圖片嘅,我從細路仔認字角度嚟睇,同埋佢又冇講語境嘅,大家加無限想像落去,係不必要嘅。都係一個公仔嚟啫,大家唔需要諗到咁負面,唔係嘅話你整個人生都好困擾。我哋有俾社會運動困擾住、俾疫情困擾住,而家又因為啲公仔而困擾!」

攝錄:蕭敬漁

----------------------------

APP 內 1-Click 訂閱 《壹週刊》

按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!