• 【15萬followers網紅B】李燦琛萌女Lucy菇頭肥腩 阿媽翻版:我以前肥到似洪金寶
  • 2020-05-10    

 

數要近年網紅B,真的非李燦琛兩歲囡囡,「肥Lu」Lucy李元元莫屬。

她憑Icon「菇頭」、「厭世樣」、似蠟筆小新的「水靴面珠」,「肥腩」,還有拿著搖控器當手機,扮煲電話粥七情上面的天份演技,成功俘虜近15萬粉絲follow,紅過爸爸李燦琛。

Lucy除因純真表現得人心,媽咪Sophia的搞笑tag,相信也是功勞。捕捉女兒好奇篤爸爸乳頭:「#無論你撥我去左邊定口邊我都係要篤爆你你你個乳頭呀爸爸」、發現有豬腩的「肥Lu」,竟然做到柔軟體操:「#我很厚,但很柔」。

日前這位小網紅,跟著高佻媽Sophia一齊為母親節訪問拍攝,在自己地頭(屋企)又唱又跳,又扮嘢,好搞笑!但對著陌生人,原來笑蛋的兩歲「肥Lu」變Cool魔。

渡過第二年的母親節,Sophia說Lucy來臨,讓她變得更有責任心。
經典畫面之一:我很厚,但我很柔。
她的icon之一「水靴面珠」,超可愛。

媽咪Sophia爆,半歲前的Lucy,黑面B嚟架!「佢直情係唧都唔笑,我同老公成日引佢笑,引到好攰,佢依然木無表情,哈哈。」扮阿女呆樣,阿媽反而笑一餐。

「不過之後慢慢有番啲笑容,我啲朋友都問:『點解你個女咁cool?』因為我同老公都唔cool。」萌味半歲後爆發。

如果你是「肥Lu」粉絲,相信好熟悉她那招,激嬲人後的補鑊樣:「揸波龍抓樣」!阿媽話Lucy每次使用,下火萬試萬靈。

「『揸波龍爪樣』,係佢自己突然做出嚟,我都唔知點解。因為個表情真係好樣衰,我覺得好難忍到笑。」剛巧Lucy跑回媽咪身邊:「BB,點樣整『摌波龍抓樣』?」她即場示範,引人發笑易如反掌。

「每次叫佢做『揸波龍爪樣』嘅時候,佢又會知道個名係代表呢個表情。」媽咪邊說,拿著貼紙的Lucy已想到新玩意,貼紙貼在額頭,自得其樂,當然阿媽都要玩埋一份。
半歲前,我愛乸口乸面。
半歲後,她由黑面B變笑蛋。
我鍾意食,但唔識煮。

Lucy之所以受歡迎,不造作的真我流露,是吸like之一。搞笑得來有個性的happy girl,相信跟媽咪管教的一套,有關係。

「我教小朋友一套,比較老派,似我媽咪嗰嗰年代,比較隨意,唔會太過緊張。例如跌倒,小朋友真係會喺跌倒中慢慢成長,其實佢只要跌過一次,就唔會重複做同一件事情。」
Sophia希望追多一個小朋友,給Lucy多個伴,對孩子性格成長也較好
「揸波龍抓樣」,自創的!替人下火息怒萬試萬靈。

講到她的Icon菇頭,原來是媽咪的情義結。「因為自己鍾意,覺得咁樣剪,個樣好傻好可愛。」再看看Sophia的童年照,留把菇頭,去到中學,依然保留齊蔭,由母傳到女的至愛髮型。

Lucy不是童星,但扮嘢起來,十足演技派,青出於藍。「佢做戲都真係幾叻,好識得扮嘢,最叻就係扮痛扮慘。」15萬的followers,非浪得虛名。她的人氣,將爸爸遠遠拋離。

Sophia不禁取笑老公:「以前啲人見到佢會嗌『李璨琛呀!』,而家啲人反而會叫Lucy,而爸爸就淪為攝影師。(爸爸有冇呷醋?)都無,佢自己都覺得驚訝,其實我都好驚訝。」

現場發現,Lucy的搞笑天份,是拜媽媽所賜。事關Sophia不時模仿女兒的動靜,一樣好笑。
原來我行緊阿媽條舊路,菇頭兼且係肥妹。
上磅量體重,但個磅反轉的,玩嘢!

令Lucy投入陌生環境,有兩樣法寶,一是播她最愛的飲歌《Baby shark》,即時醒神,二是眼前美食,酒店送來high tea法式甜品,Lucy雙眼發光,拿拿臨攞起叉子開餐!

Sophia:「佢可以唔停口,正餐可以食到大人一碗飯嘅份量。」說罷,大家齊齊發現,Lucy踎住high tea,食相相當豪邁。換轉一些家長,可能感到尷尬,勸寶寶轉個淑女坐姿,但玩得的媽咪Sophia,見到阿女這副踎姿去high tea,笑到碌地。
酒店送來的法式甜品,為食的Lucy即刻好生猛。
媽咪你繼續傾,我唔客氣!
阿媽話我好大食,是真的。
酒店的法式甜品,精緻且yummy,氹得為食得Lucy開心,媽咪也愛吃甜。

肥Lu這副package,原來係媽咪條舊路!Sophia童年都是這副肥look,兒時肥到小六,母親(Lucy阿婆)怕她升中後被人取笑,於是狠下心腸,要大食的Sophia減肥。

「小時候我係肥到好似洪金寶咁樣,大約近130磅,因為我都係不停食。直至升上中一,可能嗰段時間開始會俾人取笑,所以阿媽就逼我減肥。覺得好慘,屋企人食聖誕大餐食雞,而我就食吞拿魚沙律,之後我喺餐廳喊咗出嚟,因為覺得自己好慘,減咗半年,減咗十幾磅,最後減肥成功。」曾任model,又開時裝網店,一副衣架高佻纖瘦身型,長大後Sophia就多得當日阿媽的狠心。
食食下,發現Lucy踎住high tea的食相,Sophia不單沒介懷,還跟在場的人齊齊笑到碌地。
Sophia開時裝網店,最近玩埋母女裝。
泳裝不需性感,肉感更殺。

除扮嘢叻,兩歲人仔的Lucy又有如巨肺,唱爆咪的聲線,加上圓潤身軀,一聽強勁節奏即扭動,跳得投入時,Lucy會閉上眼,樣子陶醉又認真,「家庭觀眾」就睇得開心。

成副演藝潛質,問Sophie會否讓女兒由網紅轉做童星拍戲?「唔會,唔會!我唔係咁想,我估計老公想法都應該一樣。」她說極其量,偶爾拍廣告作個留念。當日幫女兒開ig,純因:「由始至終的目的,都係純粹開心分享,覺得幾有趣。」

鳴謝場地: The St.Regis Hong Kong

攝錄: LL Production House
爸爸李燦琛,因為我出街成日幫我同粉絲揸機影相。
豬腩,萌B必備。

----------------------------

APP 內訂閱 《壹週刊》

1Click 搞掂 輕鬆簡便

按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!