• 【禁忌之林】底褲口罩 樣衰到爆(林忌)
  • 2020-05-08    

 

疫後送口罩,好似賊過興兵一樣,已經夠晒乞人憎,睇真啲?成條似足林鄭月娥呢位阿婆(好聽啲,大媽)咁款嘅底橫,簡直就係送都唔想戴上面;嗰位所謂創科局局長薛永恒更爆笑,被問到口罩個look似底褲時,答:「呢款口罩就有如內衣褲咁,可以每日使用與清洗喎!」──有時我真係覺得香港記者好難做,畀我在現場,一定追問:「局長,乜你原來日日着阿婆底褲蒙面呀?乜咁重口味呀!」

醜,好多人都可能容忍,但係又醜又假,仲要私相授受,然後聲稱冇利益──生產口罩嘅晶苑國際市值即日升咗成7億,都未計算背後嘅政治利益;而且洗完唔可以扭乾熨乾,以香港濕度而言,唔係等兩日,就要開抽濕機先乾,咁點解唔索性買外科口罩算數?

更離譜嘅係,記者揭發原來當局聲稱咩瑞士日內瓦發明展金牌,咩銅芯弱磁場專利防污染技術,原來全部都同政府打算派嘅口罩無關;在記招把無關嘅專利技術展示,行為似足寶藥黨,海關幾時派人去拉人封艇,話佢哋違反商品說明條例?

再細心睇,點解聲稱得獎嗰款口罩個look,醒目過今日嗰款阿婆底褲咁多呢?咪好似班土共政黨嘅選舉廣告,你以為成班後生美女,其實係改相改到七彩,甚至係老笠游蕙禎張相,都係嗰句:「林鄭靠得住,豬乸都會爬樹」。

更荒謬嘅,係一個林鄭聲稱用咗8億嘅計劃,登記嗰陣居然只有一款尺碼,不分男女老幼都只得一款選擇;當初世衞成日質疑人哋唔應該戴口罩,就係話驚人戴錯口罩,戴得唔好(錯size)令人有虛假安全感,反而令人更危險,呢個原本係多餘嘅擔心,結果在林鄭政府竟然變成事實,無論係女士頭比較細,甚至係學生,都竟然都只係得同一款口罩,點解台灣三個月前就做得到嘅事情,特區政府到今日都做唔到呢?一個正常嘅政府,唔係應該多管齊下,畀市民自行選擇,究竟要用邊一款口罩,點會只係派呢隻布口罩呢?

人比人,比死人,傳媒朋友搵法蘭西政府送嘅布口罩,來比較香港呢隻 CU Mask,比較完就會知道,香港政界班天才,唔單止遲幾個月才派口罩,連選擇派邊隻口罩,都竟然可以錯漏百出;全球搶口罩時,政府就話買口罩要招標;當香港疫情結束時,政府就可以唔使招標派口罩,甚至要繼續幫襯呢款口罩買濾芯;武漢肺炎係病毒,銅化物卻係用來殺細菌;點解要做呢種多餘嘅事情?

幾個月前我哋係度笑,話政府派錢派到畀人鬧嘅政府,絕無僅有;家吓林鄭又打破自己嘅新低點,連派口罩,都會被人笑派假嘢兼醜樣到爆,班港共政棍,真係應該送去 ICU,醫返都晒醫藥費!

----------------------------

APP 內訂閱 《壹週刊》

1Click 搞掂 輕鬆簡便

按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!