• 【圈中無良僱主】成龍炒30年心腹盧惠光賠十萬好刻薄 葉璇打助手扣人工
  • 2020-05-11    

 

剛袋900萬人仔拍大陸劇的文詠珊,為慳錢炒合作十年的助手,堪稱極品僱主。而除她之外,成龍和葉璇亦是圈中「經典」僱主。

2010年,成龍突然解僱跟隨他30年的盧惠光,只賠十萬元。當年按勞工法例計算,為僱主服務超過五年,均可獲得長期服務金,計算方法是月薪三分二再乘以服務年資。盧惠光當時月薪約二萬五千元,應可拿到五十萬的長期服務金,扣除強積金的僱主供款,最少起碼仍可拿到三十萬元。盧惠光只收得十萬,足足唔見一大截。

盧惠光坦承確有其事:「我都唔知點解會俾人炒,而家等你哋幫我平反,我諗個天見到呢件事都會流眼淚,三十年就換嚟呢十萬,何止自己唔相信,就連身邊所有朋友都唔信係事實,呢十萬咪夠供幾個月樓囉。」

盧惠光過去陪伴成龍左右,在片場更衣也照顧周到。
成龍出席活動,甚至去飲宴也與盧惠光同行。
成龍無故辭退貼身助手段偉倫,他直斥成龍對兄弟無情無義。

明恰兄弟讀書少

而早於2003年「沙士」期間,成龍亦被指無故辭退貼身助手段偉倫,他替成家班出頭,直斥成龍是無良僱主,對兄弟無情無義。

當年成龍以「大個仔出去搵食」為由,將段偉倫炒魷,雖然他跟隨成龍多年,但月薪只有萬多元,遣散費十四萬,他踢爆成龍「明恰」兄弟讀書少唔識字。

「當日要即刻搵第二份工,邊度得閒同佢斤斤計較,如果要計,我哋從來冇假期,冇OT,光仔(盧惠光)離婚都係關佢事,佢要人陪到咁夜,年三十晚唔可以返屋企食飯,年初一又要兄弟陪佢去拜山,唔去就黑面。當日佢公開講話有佢成龍一日,就有段偉倫同盧惠光,點解咁對我哋?就算成家班兄弟,佢都冇乜畀機會,佢驚我哋紅咗會走,所以好少搵自己人拍戲,好多兄弟都有怨氣。」段偉倫說。

助手鬧精神虐待

葉璇的「極品」程度,跟成龍有得揮。2006年,她的前助手曹雪儀(阿雪)親口大爆:「佢(指葉璇)打我、精神虐待我,搞到我經期都亂埋!有一次佢去拍《情陷夜中環2》,我幫佢拎住批衫,落車時我掂到佢隻手,佢即時用劇本打我,發晒爛渣講:『你做乜掂我呀!』我當時好嬲,覺得好委屈,平時做阿四都無所謂,但係郁手就唔得。」

「佢屋企嘅碗碟都要我幫佢洗埋,而且佢好容易就會發火。有次叫我幫佢買外賣蛋治,點知人哋整錯咗,佢即時當住好多人鬧我死蠢。」

她表示,葉璇要她24小時隨時候命,即使放假,仍要每兩小時向葉璇報告一次行蹤。阿雪試過在放假時與朋友睇戲,收不到電話,散場後才收到葉璇多個留言,並命她趕到葉璇寓所,去到才知道,葉璇要她到寓所附近的銀行打簿,可是她因放假睇戲而過了辦公時間,最終被葉璇鬧爆。

阿雪當時每月收入只有七千元,有時還被扣人工。深夜工作完回家,亦只有二十蚊車錢作補償。

有次阿雪被吩咐代買衛生巾,因買錯牌子被葉璇指住額頭大鬧低能無腦;更試過在錄影《女人禁區》節目時,阿雪因把劇本留在車上而被葉璇大罵她「豬都不如」。

阿雪離職時,竟被扣人工。

「出最後一個月糧,但銀碼唔啱,畀少咗我。我問佢點解,佢話我有次拎漏咗對鞋,又話我曾經帶漏支遮瑕膏,要我賠償佢損失。」

離開葉璇魔爪後,阿雪轉去旅行社做領隊,坦言:「我呢世都唔會再見佢,我覺得佢咁對我好變態囉!」

助手阿雪離職時被扣人工,但她寧願盡快離開葉璇,沒再追究。

----------------------------

APP 內 1-Click 訂閱 《壹週刊》

按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!