• 【禁忌之林】賤男邏輯(林忌)
  • 2020-05-01    

 

豬女:「你唔畀我睇你手機,話大家一齊最緊要係信任,我聽足你話咁多年;頭先嗰張相咩來?嗰部手機邊個嘅?做咩成班男男女女除晒衫,進行『多人運動』添?」

豬仔:「你聽我講先啦,雖然你見到嗰部手機,影到成班女仔嘅裸照,而且張相影落好似我屋企咁,但唔代表張相似係來自我屋企,就代表成班女關我事架,可能係隔離屋老鼠成帶條女上來呢?可能係大口狗偷偷地,喺我屋企開無遮大會呢?」

豬女:「時間地點完全脗合呀!你自己睇吓張相,仲影到我送畀你份禮物個包裝紙!正正係嗰晚三四點我走咗之後,然後成班女居然上門?你同我講係巧合?話唔關你事?」

豬仔:「點解成班女上咗我屋企,再除晒衫影相,然後畀你見到,呢個係科學問題,需要科學家和專業人士研究。你唔好聽班三姑六婆講,就呢張相嘅起源問題,進行別有用心嘅操弄,藉此攻擊抹黑我,絕對係不得人心,佢哋嘅圖謀係唔會得逞!」

豬女:「癲夠未呀?我只係想問清楚你,究竟有冇背叛我?點解要隱瞞?點解頭先要刪走啲資料?你究竟呃咗我幾耐?」

豬仔:「修訂記憶數據,係國際通行嘅做法,唔存在隱瞞,請唔好捕風捉影,問題係子虛烏有,不值一駁!」

豬女:「點解一直唔畀我知,原來收收埋埋,仲有一部手機?點解一直唔畀我睇你嗰部手機?你講到理直氣壯,話可能係其他人上你屋企,咁畀我睇晒當晚個通話紀錄囉!你而家講話唔關事嘛,咁點解唔敢畀我睇?」

豬仔:「再答你一次,張相嘅起源,係需要科學家同專業人士研究;你識咩呀?」

豬女:「你呃我,你刪除通訊就係為咗隱瞞!」

豬仔:「我冇嘢需要隱瞞,唔好相信出面班友,別有用心唱衰我好冇?」

豬女:「仲有你個髮型師呢?你同佢關係咁曖昧,究竟你同佢有冇景轟?」

豬仔:「不要分那麼細,大家都是中國人,大家都係我嘅女朋友。」

豬女:「佢都係你女朋友???」

豬仔:「講錯,佢係女性朋友,你係女朋友,不要分那麼細,都係地球人,請唔好種族殖民主義,歧視個髮型師嘅職業,以及佢講嘢嘅口音。」

大口狗突然加把嘴:「想分手就分手啦,問問問咩問?你叫分手仲要搵大家來公審佢,擺明係報復,係咪傾唔掂分手費呀?你話要問個水落石出,要知道真相,有咩好問?你係咪貪阿肥仔Donald有錢,所以別有用心要來打擊阿豬仔呀?平日阿豬仔使咁多錢,買禮物畀你,又陪你飲紅酒,又同你食牛扒,仲同你去旅行,甚至一齊讀書,以至幫你搵埋份工,家吓你又唔係第一識佢,又點會唔知佢鍾意去滾?再問呀嗱?佢介紹你嗰份工,你都冇埋呀!」

豬女:「死豬仔,你呢個咩朋友來?你聽佢點樣出言侮辱我?你搵佢威脅我呀而家?」

豬仔:「大口狗講嘢有咩問題?而家係你嘅錯誤言論,引起我同我班朋友,感到十分不滿喎,佢講嘢有咩問題?我唔知道你所講嘅威脅,係乜嘢喎!」

大口狗再答:「喺呢個關鍵時刻,豬女你從背後捅一刀,不知是何人指使,何人授意,更不知道收了誰嘅黑錢。你爆料係真係假,暫且唔講,你吃豬仔嘅飯,砸豬仔嘅鍋,呢種行徑令人不齒!沒有豬仔,你連豬仔包都不是!做人要學會感恩,如果不能自發感恩,請主動接受感恩教育。」

豬女:「死開啦你,死賤男!我哋分手啦!」

----------------------------

APP 內 1-Click 訂閱 《壹週刊》

按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!