• 【禁忌之林】星洲炒粉馬騮戴口罩(林忌)
  • 2020-04-24    

 

「搶糧食與搶廁紙?醜怪!低能!唔好Monkey See monkey do(有樣學樣),學香港人食咁多飯與即食麵,肯定腸胃炎!」有位來自星州嘅高官,自信滿滿地向佢班支持者發表偉論;同時聲稱口罩不夠,因此佢哋個政府信世衞,只會叫有病嘅人戴口罩,而冇病嘅就唔應該戴。

結果愚人節嗰日,全國只有一千宗確診嘅新加坡,在短短24日內,確診數字升到11,178宗,月初嗰時又有邊個會諗到,新加坡會在2-3個星期時間內,最終確診人數超越當初長期排第二嘅南韓?諗住慳口罩,然後又唔理班外勞住擠迫嘅宿舍,結果唔單止死死氣要改口,內閣要帶頭戴口罩,甚至全國經濟全面停頓,再規定全民外出都必須戴口罩──短短兩個月,笑人者被人笑返轉頭,現眼報,馬騮表示:「人類總要重複同樣嘅錯誤,我好忙,唔好再搵我來抽水。」

二月中嗰位星洲高官發表偉論後,香港仲有班友盲撐佢,唔計神棍「銀雲」,仲有賣港01嘅編輯室發表偉論,力讚坡佬信世衞叫國民唔戴口罩,係「香港所欠缺嘅憂患感和自強的決心」喎──原來唔戴口罩先係有憂患意識,戴口罩卻係冇憂患意識,睇呢啲內容,就真係懷疑個作者個腦中咗銀離子毒。

當時香港都有個「香港醫學組織聯會」開記招,當中有位擔任世衞傳染病流行病學主任嘅司徒永康,都呼籲香港人唔需要戴口罩!今日用新加坡同香港比較,就係最好嘅反證──信世衞,唔戴口罩,就係會大爆發,歐美幾多個國家就係信世衞而中伏!

一批又一批中伏嘅國家,包括美國嘅CDC改口叫人戴布口罩,捷克、斯洛伐克政府都主張戴口罩,奧地利要人去超市即戴口罩,德國由首都柏林到各大城市,都改規定要坐公共交通工具戴口罩,連「佛系抗疫」嘅英國,都終於有批專家出來改口,叫人戴口罩;然後成班人仲係度抵賴,話「越來越多證據,證明戴口罩有用」喎──冇野呀?要到四月先見到「證據」?

世衞早就知道人傳人,連中國班黨性大過理性與人性嘅「專家」,都出來爆咗中國武漢肺炎有好多人冇病徵,卻已經在播毒;甚至早在二月頭,中共官方嘅衞生部,都要確認有空氣氣溶膠 (Aerosol) 傳播!任何可以減少飛沫,都明顯係有用嘅方法,世衞成班瘟神仲好意思話「唔夠證據」?情況竟有如你對住譚德塞拎把刀出來,佢走唔走?要被人斬到一頸血,先至話「越來越多證據顯示」,呢種叫「邏輯」,定係反智?

有左膠寫咗篇〈不要讓別人利用仇中情緒〉,話Trump做得更差,仲話Trump嘅所作所為先係『反人類罪行』喎──共諜搵美國播毒呀?美國做得差唔差,關香港人咩事?明明係中國同世衞做得差,惹禍全地球,竟可反屈美國一口?2月3號美國封中國關,中國鬧美國「過度反應」,世衞譚德塞仲幫中國拖,話「關閉邊境可能會加速病毒傳播,會激起人偷渡」──因為怕人偷渡,因此應該大開中門畀中國人入,呢種荒謬到冇人信嘅語言出自世衞總幹事之口。

信世衞唔封關,大爆發;信世衞叫國民唔戴口罩,大爆發;今日都已經衰到貼地,世衞去到4月6號,都仍然堅持叫人唔應該戴口罩,以免製造「虛假安全感」,以及病毒可以由眼睛進入身體。呢個組織一錯再錯,累到全球病毒大流行,冇人需要問責,唔需要換人領導,然後堅持由一班親中共嘅偽專家,繼續領導全球防疫?

正正就係有世衞呢個偽權威,結果全球提出真理嘅科學家、傳染病學家,都被呢班「偽專家」以「世衞建議」一棍打死,然後成班天才就衝出來,話你哋係假新聞、偽方法,就連YouTube都話要跟世衞建議,來審查對中國武漢肺炎嘅內容!世衞錯咗,冇人可以糾正佢,亦冇人可以推佢落台,然後因此要繼續錯落去,由地球人大批死亡,你話邊有咁樣嘅道理?

----------------------------

APP 內 1-Click 訂閱 《壹週刊》

按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!