• 【疫境多搞作單拖四圍撲】曾俊華快閃派口罩 又孖雞丁合唱《好想返學》
  • 2020-04-24    

 

中聯辦與《基本法》第22條嘅問題,搞到滿城風雨。其實,《基本法》第22條白紙黑字清清楚楚,但中聯辦偏要學公孫龍白馬非馬,而特首林鄭月娥亦乖乖跪低,漏夜改稿服侍主子。

大家一定記得林鄭講過:「如果香港人主流意見令我無辦法再擔任行政長官,我會辭職。」當然,講吓你就信咩,佢個鼻可以媲美《木偶奇遇記》喇!而就住中聯辦與《基本法》第22條嘅事,相信林鄭心底裡應該會暗叫好彩,好彩當年「2017行政長官選舉辯論」之上,胡國興嘅問題,係問曾俊華,而唔係自己。如果唔係,林鄭可能都係講就天下無敵,但實際做法就繼續自打嘴巴,個鼻長到可以晾衫啦。

胡國興:「如果有國內人員、駐港人員干預香港事務,你係點樣處理呢?」

曾俊華:「《基本法》第22條講得好清楚,駐港三個唔同機構佢哋功能係咩,而管治係歸香港政府。如果我哋唔放棄我哋嘅權力,我哋唔畀人干預我哋嘅工作,我唔相信有任何機構係可以干預到、可以影響到我哋管治方面嘅能力。」

諗諗下,曾俊華嘅言行下下都大巴大巴車落林鄭度,以最近情況為例,政府抗疫無能連口罩都冇咩?曾俊華就協助田北俊嚟個中環快閃派口罩,仲啱啱好四個人明寸政府「限聚令」;兩子之母林鄭連Playgroup係乜都唔知咩?曾俊華就直接同因為一曲《武漢肺炎》而爆紅嘅中二生YouTuber雞丁合作,唱返首《好想返學》,成個《風生水起》麥玲玲咁喺度rap,仲搞笑話「樂壇欠我一個交代」。

記得曾俊華離任財政司司長,參選行政長官期間,好多人批評佢「守財」。諗返轉頭,林鄭班人其實要向佢講聲多謝添,唔係佢「守財」,邊得嚟依家咁多錢亂咁揈,仲可以喺香港失業率超過9年來高位、就業不足率近10年高位嘅艱難時期,逆市加自己人工!

唔係話曾俊華好,但都係嗰句啦,佢可以大街大巷單拖四圍走,特首林鄭學唔學得掂先?睇怕去便利店買廁紙佢都膽顫心驚啦。Oh,sorry,唔知佢仲記唔記得便利店無廁紙買。

攝錄:Sky

----------------------------

APP 內 1-Click 訂閱 《壹週刊》

按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!