• 【喜出望外】三人成虎(王喜)
  • 2020-04-14    

 

同一天,同一位記者好友來電好幾通,煞有介事要我回應兩件事:「喂呀,你知唔知呀,阿毓民响 facebook 話你參選立法會選舉呀!係咪真㗎?」

回:「咁大件事?我自己都唔知,畀少少時間我睇睇先覆你。」

記者憂心戚戚問:「你真係選呀?」

回:「喂呀,等我睇咗原文先答你啦,傻豬。」

掛斷後,昂藏六尺的上海理髮店首席理髮師兼老闆,俯視躺在裇髮椅上的我,邊磨剃刀邊問:「你去選立法會議員呀?」

弱弱的回:「我都係剛剛先知,可能有人同我開玩笑。」

老闆舉刀問:「真係唔選呀?」

坐直,回:「畀一分鐘我睇少少嘢先。」我打開臉書,老闆繼續磨刀。

剎那間,回到前年。同樣的季節,同一位記者好友來電,煞有介事問:「你去新城做CEO 呀?新城有份開會嘅人講㗎,得,得,得。未成唔好答住吖嘛,我明,恭喜哂呀!好開心吖,加油呀你。」

頓時,手指滑到大佬孝邵仲衡發出的圖文,見黃毓民教授、大佬孝和王宗堯並肩同桌,三壯士握拳振臂,誓師出戰之味甚濃,配文道:「選戰(王宗堯曾效力的香港電視製作的劇集),撐唔撐先?」點題精準,引人入勝。

「有人話」語帶相關,既可解作有人提出,或市面上終於出現為人民發聲之徒。再來「香港人要我哋出嚟參選」,圖文並茂,直指三人。不過,話風一轉:「呼叫王喜。」

我?是因吃飯不叫我而良心發現,所以想起我?哈哈。最後一句:「時代選中了你」我?Hello⋯⋯

前年回應「入主新城做CEO」的經驗,得高人陳某教路:「無幾可傳你有好嘢,由得佢哋傳。」

到今趟「回應是否參選」再向高人陳某求助,一盞茶未涼,西方文明國家級交外水準的回應來了:「Luckily. This is a call from Man, not from God.」中文譯本:「幸好這召喚是來自人,不是來自神。」看,多優雅,多睿智。各國政府想招聘高水準外交大臣的話,私信我,免佣!相信大家都明白同一件事物,來自人和神之間的分別,恕不贅述囉。

當日第二件要回應的事,來自一張合照。

涉及人物是我和一位男士,地點是偷情勝聖地 —— 海 X 大廈露天停車場⋯⋯側,時間是三月底的一個黃昏。此情此景,還不趕急召開線上記者會,鞠躬發聲明?想太多了。記者好友一貫煞有介事:「喂呀,你三月二十三號,喺咪去過海 X 大廈停車場附近,無戴口罩拍嘢呀?」立即查手機日程,回:「係吖,嗰日拍《警棍懸紅》,發生乜嘢事呀?」

記者老友沉重地問:「嗰日,你係咪同一個男人影過相吖?」

「係吖,除非對方無禮貌,否則,來者不拒吖。」

記者加倍沉重問:「港聞同事叫我通知你⋯⋯嗰個男人確診咗(武漢肺炎)。」

正當老友準備開聲安慰前,回:「我驗咗啦!」

老友被我這一記反高潮,潮個正著:「吓!衛生防疫中心搵咗你喇?(憂心咬唇)你無事吖嘛?驗咗未吖?你唔好有事呀……」

一股濃情厚意,遊走任督二脈七大周後:「我朋友個朋友個朋友,同呢位男士同一日確診,我同佢都戴住口罩,坐响同一架車廂約三分鐘,所以,我上星期已經去驗,隔一日出咗報告:陰性。」

老友回:「係咪真㗎?你唔係呃我㗎?你係咪唔想我擔心吖?」下刪三千字說服老友的經過,不贅。

如果閣下都有一位事事都煞有介事,為你擔心、為你焦慮的老友,就忍忍手、忍忍口,留在家中抗疫,等有天解決這生化武器的源頭後,就會有命跟老友重聚。

王喜簡介:

前生救過人生命,今世命中得華蓋,火場再救兩同袍,從此科幻稱英雄,卸甲還槍進金樓,隱姓埋名笑迎人。問風水:南山北水九運火、問遺失:生離總比死別好、問自身:妄想悶聲發大財、問天時:願榮光歸於香港。高效能自閉及重度強迫症患者一名,恐懼人群卻賣藝維生,表面無畏,內心怯懦。滿身矛盾,可愛又可惡的五十男。

----------------------------

【壹週刊 武漢肺炎專頁】

緊貼防疫資訊!口罩訂購情況、確診個案、病徵潛伏期、封關國家名單、保險點賠?

與你遠離瘟疫 睇清官謊!

-----------------------------

【《壹週刊》昔日紙本檔案庫】

30年壹仔經典 壹壹重現!

-----------------------------

【全新電子書平台|壹本書】

《沙士風暴》全面揭露沙士真相