• 【禁忌之林】譚德塞一定係中國人(林忌)
  • 2020-04-10    

 

我真心、誠懇、完全相信,世衞總幹事譚德塞絕對係一個中國人!睇吓譚生佢昨日開記招,痛罵台灣歧視佢,屈返台灣外交部一口,你真係相信佢係埃塞俄比亞人?冇可能!你認真覺得佢同耿爽、趙立堅、華春瑩有分別?冇可能,大家絕對唔應該因為譚生佢睇落黑黑地,就歧視佢!要記得,大家都是中國人!

又再問吓你,譚德塞有邊一忽(唔計膚色)唔似中國人?嗱,除非你係種族主義者,睇佢皮膚黑,就歧視佢係非洲人,譚生有邊樣嘢同中國人有分別先?

譚德塞由1月堅持「冇證據」病毒會人傳人,反對疫情升級,反對各國從中國撤僑;到2月叫呼籲各國不要對中國設旅行、貿易限制,不要取消往中國航班,不要關閉邊境,再讚中國「犧牲自己救全世界」,聲稱「中國為世界贏得不少時間」,堅拒升級做「大流行」(Pandemic),說升級會造成全球恐慌!當見勢色唔到,全球開始大爆發,譚生去到3月就倒轉來講,話「因為各國嘅不作為,因此疫情失控變成大流行」!

叫人唔好恐慌係世衞,鬧人唔做嘢又係世衞;叫人唔好封關設限係世衞,事後就鬧人唔做嗰個都係世衞!認真問你一句,呢種人,同你在中國外交部,以至在中南海見到嗰班姓賴嘅瘟神,有分別嗎?咁愛中國,又完全似一個中共嘅官員譚生,佢唔係中國人,仲有邊個係中國人?

當美國總統與部份議員,表示要凍結世衞撥款,指控世衞「以中國為中心」──即係中國開嘅,譚生點回應呢?「如果唔想見到更多屍袋,就要停止將疫情政治化」,Come on Tedros,人哋質疑你偏幫,你唔係以事實去反駁,竟然係靠嚇?「更多屍袋」、「政治化」?唔做中國人真係浪費啦!

請問「非政治化」可以點樣幫到疫情?請問世衞在成個疫情做過乜?去到今個星期仍然拒絕修改對口罩嘅建議──美國CDC都已經改埋,世衞在「討論」後仍然堅持口罩冇用,個理由真係聽完都忍唔住笑:「口罩會製造虛假嘅安全感,因為即使罩咗個嘴同個鼻,病毒仍然可以由眼睛入侵」──原來戴咗口罩,就唔識戴眼罩!咁不如建議大家唔好戴Condom啦,你戴咗Condom,HIV病毒仍然可以由嘴部入侵!問大家一句,如果你國家死咗萬幾人,四十幾萬人染病,你仲會唔會繼續撥款畀呢位譚德塞?仲會唔會撥款畀呢個「中國世衞」?

所以譚德塞於前日記招,大大聲話台灣「歧視」佢──做錯事被人鬧,就反屈對方歧視自己,呢招係咪好面善?由咪好似平日大家見慣見熟,嗰班做錯事仲要惡人先告狀嘅作風?譚德塞投訴,被人歧視話佢係「黑人」──你知道譚生幾傷心嗎?你竟然唔係叫佢中國人,而係叫佢黑人?家吓係咪暗示黑人就唔做得中國人先?

佢同事──被港台訪問發老脾cut線嗰位Bruce Aylward,早前搏老命瞓身話「如果中武肺,想去中國醫!」已經成功超越譚德塞啦!你哋仲提佢係黑人?知唔知中國大陸係點樣歧視黑人嘅?咩廣洲幾十萬黑人,最近仲有班小粉紅做圖,叫中國人把「洋垃圾」──特別係黑人分類㖭!家吓世衞各級官員都紛紛搏盡,譚德塞有危機感呀!

唔使怕,要信中國政府!譚生,你知道有批中國知識分子點樣稱讚你嘛?一個世紀前有班中國人追求「德先生」(Democracy),「塞先生」(Science),家吓成功爭取,中國擁有了譚德塞先生!係咪開心死呢?祝譚德塞無論有冇病,都要去中國醫!祝譚德塞永永遠遠,子子孫孫,大家都是中國人!

----------------------------

【壹週刊 武漢肺炎專頁】

緊貼防疫資訊!口罩訂購情況、確診個案、病徵潛伏期、封關國家名單、保險點賠?

與你遠離瘟疫 睇清官謊!

-----------------------------

【《壹週刊》昔日紙本檔案庫】

30年壹仔經典 壹壹重現!

-----------------------------

【全新電子書平台|壹本書】

《沙士風暴》全面揭露沙士真相