• 【有疫症先出新作】兒歌醫生陳以誠 孖蓋世寶合唱武肺歌《擊退病毒》
  • 2020-04-09    

 

細個聽兒歌,大家聽邊個?陳以誠醫生,必定榜上有名。事隔多年,佢再次出山,更搵埋童年集體回憶Lulu姐姐蓋世寶一齊合唱,新歌叫做《擊退病毒》,亦即係關於武漢肺炎。

66歲嘅陳以誠係兒科醫生,因為唱得多兒歌,亦叫做「兒歌醫生」,而佢最出名、最琅琅上口嘅,多數都係一啲關於病毒嘅歌,例如《眾志成城抗肺炎》、《超級流感》、《滅蟲週記》等,亦即係2003年嘅SARS、流行性感冒以及登革熱呀!「登革熱,登革熱,我要決意隔絕。應隔絕登革熱,快快把蚊消滅!」眨下眼,首歌大大話話已經十幾年,真係慨嘆「時日太快,無知的小孩一晚長大」。

講返新歌先,陳以誠醫生繼03年SARS後再出肺炎歌,將《超級流感》重新改編、填詞成為《擊退病毒》。講真,啲歌詞同首歌嘅音好似唔太夾,有啲夾硬嚟。不過,兒歌係咁㗎啦,勝在歌詞有意思吖嘛,好似:「怎麼可以預防新冠狀病毒?怎麼可以不怕碰到病魔?小心自摸,厠所要冚蓋,梘液廿秘洗手重要。」

對於「兒歌醫生」出山,網民都話好似返咗十幾年前咁,童年回憶返晒嚟。亦有人道出陳醫生要有大疫症先有新歌,又好似係喎。至於歌詞部分,網民指寫得太客氣,應改為「怎麼可以預防新中國病毒」先夠貼地。

Anyway,大家都係武漢肺炎歌,陳以誠與蓋世寶呢個組合唱《擊退病毒》,總好過陳奕迅和蔡依林首《Fight as One》「感謝中國」。

----------------------------

【壹週刊 武漢肺炎專頁】

緊貼防疫資訊!口罩訂購情況、確診個案、病徵潛伏期、封關國家名單、保險點賠?

與你遠離瘟疫 睇清官謊!

-----------------------------

【《壹週刊》昔日紙本檔案庫】

30年壹仔經典 壹壹重現!

-----------------------------

【全新電子書平台|壹本書】

《沙士風暴》全面揭露沙士真相