• 【四歲開始做童星】武漢肺炎令奧運夢延期 吳諾弘:如繼續意志消沉,會影響士氣
  • 2020-04-08    

 

吳諾弘四歲開始做童星,拍過多部劇集,如在《宮心計》演「童年陳豪」、《On Call 36小時》的杜梓霖等。現年二十歲的他,早已由娛樂圈跳入體壇,目前是全職香港男子劍擊運動員。

二月底,吳諾弘與隊友取得男子花劍四項奧運資格,原本今年會去東京奧運打世界盃四強,可惜一場武漢肺炎,搞到奧運要延至明年七月,奧運夢要等多一年。不過吳諾弘並沒有洩氣,自強說:「如果繼續意志消沉,會影響士氣。」

延期好過取消

吳諾弘的童年過得十分精彩,除了邊拍劇邊返學,同時更踩入劍擊界,三年級開始打學界比賽,小四至小六已經三度蟬聯全港小學學界個人花劍冠軍。

12年,他考入拔萃男書院,中五時選擇休學加入港隊。今年成功與隊友殺入奧運,可惜東奧因武漢肺炎而延期,令一班運動員士氣有所打擊。

「大家呢一年嘅訓練都好辛苦,現時奧運延期,的確會有啲失望。但延期都好過取消,因為如果取消嘅話,大家嘅努力都會白費,現時只係延期,大家仍然可以繼續努力。不過現時我覺得最關鍵嘅係,大家要盡快調整心情,因為如果繼續意志消沉,會影響士氣同埋一年後嘅表現。呢段時間如果大家唔積極一啲嘅話,就會浪費之前訓練付出嘅血汗。」他堅定地說。

雖然延期一年,但他覺得影響不大,「我覺得體能方面絕對無問題,因為延期一年,變相就係有多一年時間準備,我覺得只要大家現時唔好停下腳步,繼續努力練習,對我嚟講,反而技術上有更多時間練習得更好。」

體院自我隔離

疫情肆虐,對於空手道運動員李振豪、曾綺婷、周家謙、教練及總教練William Nicholas Thomas先後確診武漢肺炎。曾綺婷表示曾在體院自我隔離,體院對運動員有特別安排。

為保護自己和他人,不時到海外集訓的吳諾弘也有自我隔離。

「體院有提供選擇方案,其一係如果想練習,就可以返去體院,但由現在直至八號都唔可以離開,要留喺體院生活同練習,否則就可以家居隔離,而我就選擇咗家居隔離。

有聽過一啲喺體院生活嘅人表示,甚至唔會離開宿舍,連飲食都喺宿舍進行,例如將飯餸帶返宿舍,或者有人負責喺飯堂送外賣到宿舍。」

全職運動員底薪六千幾

小學讀啟基,中學讀男拔,出身名校,吳諾弘卻選擇做全職運動員,事關他不是向錢看。

「全職運動員底薪係六千幾,最多就係三至四萬,我覺得其實經濟壓力不大,因為首先體院包食宿,其實呢方面已經幫我哋減輕好多壓力,提供住宿地方同飲食,開支方面都減少好多,而薪酬就因人而異,會因應個人成績。對我嚟講,係完全無問題同無壓力,因為只要減少支出,亦唔好胡亂花費,其實收入係絕對足夠應付日常生活。」

劍擊是花費的運動

自小演戲,吳諾弘拍過三十多部劇集,既做童星,同時父母對他悉心栽培。

「細個嗰陣父母都花咗好多錢喺我身上,因為劍擊係一種花費幾大嘅運動。首先器材都唔平,只係劍條都可能要千幾蚊,我覺得其實係一種花費頗大嘅運動。我估計父母每個月都要花幾千蚊喺我身上,只係學費,未包括器材,因為器材壽命都比較長,但只係報讀個人訓練班,已經差唔多要花費幾千蚊,其實當年真係花費咗好多錢,仲未計算要到外地比賽,當中要負擔額外開支,嗰筆費用仲未計算在內。」

因為要兼顧學業和打劍,吳諾弘十六歲開始減少拍劇,十幾年拍劇生涯裡面,他最難忘拍《巨輪》。

「因為拍呢套劇,我記得係唯一一次要到外地拍攝,當時要專程到澳門取景,同埋拍攝時間都比較長,因為戲份都頗多,同埋都幾辛苦。有一場戲講我同哥哥一齊游水,當時我哋游咗好耐,因為一個鏡頭可能需要拍攝一段時間,我哋兩個上岸之後都筋疲力竭,連對白都講唔到。」

現仍然要努力備戰明年的東奧,希望在不久將來,可以再在熒幕見到他啦!

----------------------------

【壹週刊 武漢肺炎專頁】

緊貼防疫資訊!口罩訂購情況、確診個案、病徵潛伏期、封關國家名單、保險點賠?

與你遠離瘟疫 睇清官謊!

-----------------------------

【《壹週刊》昔日紙本檔案庫】

30年壹仔經典 壹壹重現!

-----------------------------

【全新電子書平台|壹本書】

《沙士風暴》全面揭露沙士真相