• 【拍大台劇差啲冇命】好戲綠葉張松枝爆外景車車底穿窿:仲喺山崖後溜
  • 2020-03-25    

 

早前ViuTV一齣神劇《二月廿九》,綠葉張松枝飾演女主角父親,對亡妻不能釋懷的演技,令人眼前一亮。被網民稱為「港版孔劉」,跟韓星偶像幾分似的他,出身大台,一待十八年,當日憑《茶是故鄉濃》一個「二世祖」角色受注視。不過同孔劉撞樣,卻沒有孔劉的男一命水,在大台日子,大部分徘徊三、四線,定型奸角。直至12年決心離開流水作業式大工廠,張松枝的演出變得多元化,由港視《警界線》、ViuTV《二月廿九》,及多套電影,又一個告別大台的破格演員。

沒有被迫的合作,條件不合理,選擇離場無怨無悔,是張松枝的態度。「我離開嘅原因係因為結咗婚,有小朋友需要養家,唔可以靠嗰份人工去照顧家庭,知道係無可能嘅事,所以先會決定離開。如果而家再返去,都係咁嘅人工,我都係生存唔到。所以唔返最主要原因就係養唔到屋企,唔可以再過嗰種生活。

雖然過往角色被定型,但都感激俾我種落嘅成果,演過嘅劇集如《鑑證實錄》、《刑事偵緝檔案》,仲不停喺內地重播,從而令內地製作人認識我,都係一個機會。」

徬徨時古天樂扶一把

12年由大台過檔港視,又因港視不獲牌照,不似如期的跳槽,張松枝一度為失業徬徨,幸得一位同行貴人在急難中扶一把。「喺我最徬徨時,好多謝古天樂關照,佢知道我嘅情況,即刻搵我拍戲。第一部拍嘅電影就係《Z風暴》,開工時古仔已經主動搵我傾偈,問我近況,有冇需要幫忙,佢仲話介紹經理人我認識。佢真係好關注同俾機會我哋演員,雪中送炭,俾我一個希望,多謝佢。」

我在大台的日子

今年52歲的張松枝,是94年大台藝訓班學生,同屆有吳家樂、劉愷威、梁雪媚、及陳彥行。投身電視前,已半隻腳踩入娛圈,拍過無數卡拉OK影碟MV,有「卡拉OK王子」之稱。

在劇集《茶時故鄉濃》演活「二世祖」,但現實他不是無憂米,就算03年患上甲亢,為生活仍日以繼夜,夜以繼日地埋位開工。

賠上了健康

張松枝說:「當時患上甲亢,影響咗新陳代謝,所以會令人一時肥腫,一時又會好瘦,同埋雙眼會凸。當時我拍緊古裝劇《金牌冰人》,最初仲未清楚自己患上甲亢,直至有次去加拿大拍旅遊節目,十幾日嘅拍攝期,我忽然瘦咗廿幾磅,變到好瘦咁返香港。當時心諗:『咁好,咁容易就減到肥?』,之後慢慢出現手震,同時心情好暴躁,又瞓唔到覺,心跳得好快,慢慢雙眼凸出嚟,開始發覺有啲問題,覺得雙眼好似經常發炎,同埋有時候口齒唔清晰,記性變差,後來驗血先知出咗事。」賠上了健康。

患病初期,怕手停口停,不敢告之任何人。「唔敢停工呀,因為要搵食,盡量希望一邊食藥一邊開工。不過當時開工都好勉強,因為口齒唔清晰,維持咗一年咁樣,之後先去番正常狀態。不過中途都決定同幕後同事講,當時好多謝佢哋嘅體諒。」

唔死即係仲有機會

拍劇拍到五勞七傷,負傷上陣,要視作等閒。

「其實腰同腳嘅關節位都出現問題,因為所有嘢都要親身上陣,當時為咗表現自己都無辦法,十幾二十呎嘅斜坡都要就咁跳落去,無得選擇,唯有頂硬上,只要唔死就得喇,唔死就即係仲有機會。」廉價勞工,但人命並不是廉價。

跳河戲驚見死豬死雞

還有劇集以外,不為人知的驚心動魄。



「那時候好多驚心動魄嘅情況,我記得拍《酒時故鄉醇》(在廣西取景),去到比較落後嘅地方拍攝,第一場戲講述我跌落一條河,因同林家棟比賽輸咗唔忿氣,然後俾人推落河,碼頭距離水面十幾呎,然後我跌落水,原本呢個場口無咩大問題,但我見到河入面有啲死豬、死雞,你唔知道水裡面仲有乜嘢!然後武師話要開始拍攝,催促快啲跳落去,當刻真係頂硬上,落到去都唔知發生咩嘢事,就算上番水面,嗰啖氣你唔敢吸,嗰啖水你唔敢飲, 真係好恐佈。」

開工車甩皮甩骨

那些年開工,自求多福。

「當時取景拍攝地方比較偏遠,車程比較長,我記得有個地方車程要四個鐘,我哋坐一部車去,唔知點解,內地汽車都比較殘舊,在汽車座位下面可以睇到地下,發覺輛車穿窿,究竟仲行唔行得㗎?有一次喺條山路,司機唔識得控制,輛車向後溜,成班演員坐喺車上面,側邊就係峭壁懸崖,撞一撞就會跌落山,咁就全部人都會玩完。當時車上有兩位司機,另一位司機即刻頂上駕駛,慢慢架車就開始行得番,我哋先至無咁驚。當時真係會諗,係咪要上天家呢?」又一次大難不死。

離開大台,待遇大不同。

「全部都會比較人性化,唔會太過夾硬嚟,唔會為咗爭取時間拍攝令藝員咁辛苦。

就算而家都有做拍動作場面,如之前電影《風再起時》,導演翁子光指導下,有一場戲我喺二樓跳落嚟,但大家會做足所有安全措施,先讓我去演嗰場戲,導演都唔會讓演員去冒險,所以而家做嘅都好舒服同開心。」

撰文:Sukey

攝錄:黃志明


----------------------------

【壹週刊 武漢肺炎專頁】

緊貼防疫資訊!口罩訂購情況、確診個案、病徵潛伏期、封關國家名單、保險點賠?

與你遠離瘟疫 睇清官謊!

立即睇

-----------------------------

【壹週刊直播平台 ChannelNEXT】

專家教你自保攻略|口罩點揀|防疫點做

立即睇

-----------------------------

疫情追蹤,最新消息,Follow 壹週刊Telegram:

點擊追蹤