• 【離大台失意到爭氣】節目贏口碑自信返晒嚟 金剛:當日帶住失落咁走
  • 2020-03-19    

 

「嘩,不得之了啦!」呢句口頭禪嘅主人翁金剛,近日「重振雄風」,轉場到ViuTV的旅遊節目《金剛旅神團》,由舊拍擋搞笑小儀,轉為四條索Queen(陳俞希、沈殷怡、余逸思、練美娟),一度成為該台Hit榜榜首。「好耐無做屬於自己嘅節目,依家收視又好,我當然開心。」半咸淡廣東話嘅金剛,生猛番晒。節目收得,原定強勢回歸的密集式宣傳,卻因疫情下的隔離政策,打亂陣腳。「可能年紀大,好多嘢不用想之後係點,用盡所有力量做好眼前嘅事,已經足夠。」

三年前,完成《街坊廚神重出江湖》,他在大台鬱鬱不得志下離場,黯然撤退十年心血的香港,執包袱返鄉下,回台灣再碰運氣。

「當日離開香港當然有失落,在港十年,當呢度係第二個家,好多回憶,開心同難過都有,所以當日走時,心入面有難過,覺得十年就咁冇咗。」

由紅主持跌到坐冷板,離開香港時的金剛,自信心跌到好低。「可能越老越冇信心,加上後期做嘅節目成績又唔太好,所以今次得咗,我覺得重新建立番自己信心。」他千叮萬囑,要多謝四位女主持的功勞。「相信只得我自己,係做唔出呢種效果。當然仲要多謝我女友(梁云菲),著三點式為我節目客串出場。」

39歲,過往情場浪子,今日有結婚打算的金剛,戒了大花筒作風。風光時,一個外快司儀job收入可觀,一個月閒閒地六位數字收入,但當時搵得多使得大,他說試過同三個朋友打邊爐,一餐可以近萬元埋單;同時他是購物狂,限量版波鞋、靚衫等買滿一屋,係又買唔係又買,無居安思危的金剛,沒料後期隨著恩師曾志偉與綜藝科高層的余詠珊不和而「淡出」大台,有傳金剛受「誅九族」的波及,進入冷板期,工作量大跌,洗腳唔抹腳,無乜積蓄的他試過戶口使剩幾百蚊,靠食杯麵渡日,那段失意日子亦觸發他離開香港,回台與父母生活。

「戒咗大使啦,依家只買必需品,唔似以前揾錢易就亂咁花,鍾意就買,一半鍾意都買,但依家就算好鍾意,都會諗下先決定買唔買。」經歷過挫敗,令狂妄的男人變得穩重。

舊拍擋小儀,近日亦不跟大台續約,金剛望有朝合體,《街坊》系列捲土重來。「我都好想同小儀再合作,希望嚟緊有呢個機會。」

39歲的金剛,原名李信樵,台灣人。02年入行演出《麻辣鮮師》第三代「金剛」彈出,之後索性將成名角色作為藝名,過江龍發展。金剛入行由skin head至今日光頭icon,有頭髮的歷史,有幾多觀眾「欣賞」過?

最睇唔順眼有頭髮的金剛,正是他本人。事關他對一頭天生鬈髮視為天敵。「讀中學時,我嘅偶像係郭富城,好多同學都學佢個髮型,我都係。但我把鬈髮要吹好耐先可以勉強似Aaron頭,出門要用幾個小時去吹頭,好煩。但遇到一個風吹,成盤心機就冇晒。有次把鬼火走去將頭髮剷短,點知出嚟效果好襯我,自此我就自己動手剷短,越剷越短變咗依家光頭。」

+8


----------------------------

【壹週刊 武漢肺炎專頁】

緊貼防疫資訊!口罩訂購情況、確診個案、病徵潛伏期、封關國家名單、保險點賠?

與你遠離瘟疫 睇清官謊!

立即睇

-----------------------------

【壹週刊直播平台 ChannelNEXT】

專家教你自保攻略|口罩點揀|防疫點做

立即睇

-----------------------------

疫情追蹤,最新消息,Follow 壹週刊Telegram:

點擊追蹤