• 【《二月廿九》會長拍拖冷戰精彩過電影情節】劉俊謙當街搞喊女友蔡思韵
  • 2020-03-19    

 

ViuTV神劇《二月廿九》,飾演會長的劉俊謙,為女主角逃過劫難而作出犧牲,佢嘅情深,搞到好多女粉絲都為佢傷心。

現實中呢位新影帝,發現佢同女友蔡思韵當街嗌交,仲搞喊埋對方,

佢可以點收科,氹番仙氣女友呢?

無論係《教束》,抑或《二月廿九》,劉俊謙都迷到唔少女粉。佢同真‧女友蔡思韵去年因拍電影《幻愛》戲假情真,拍拖大半年,呢對金童玉女一直好sweet,早排仲齊齊攞咗電影評論學會頒發嘅最佳男女主角獎,幕前合拍,鏡頭後呢一啤,同其他情侶一樣,都有爭執嘅時候。

早排壹仔發現,佢倆當街冷戰之前,一齊買咖啡,排隊期間,蔡思韵又捽面,又攬攬,好sweet。不過鏡頭一轉,兩個喺海旁坐低傾多兩句就嚟料!你一句,我一句,意見不合,採取沉默。之後女友蔡思韵主動拖番劉俊謙,想緩和一下僵局,但雙方依然你一言我一語,結果蔡思韵越講越嬲,索性用個背脊對住男友,進入冷戰。

女方已示「紅旗」,但劉俊謙冇罷休之意,對住女友背脊依然唔收口,繼續理論。唔知蔡思韵係咪越聽越傷心,突然伏下哭泣,仲喊到戴住嘅漁夫帽都跌埋。

女人嘅眼淚,幾時都係最強武器,搞喊女友,劉俊謙起初都顯得手足冇措。有愛情專家講過,伴侶間破冰秘訣,就係先重情,後講理,即係唔理咁多,氹咗先再講。劉俊謙終於識做,拍拍女友肩膊呵番,女友亦即刻下火,受氹!

破咗冰,女友撤回「紅旗」,30歲嘅劉俊謙好似小朋友一樣,要求錫錫補數,好搞笑!唔好以為呢幕係sweet ending,未完!咀嘴完,劉俊謙繼續安撫女友幾分鐘,直至穩定情緒,一顯呢位新晉影帝嘅耐性。

兩個再一次好好溝通之後,嚟個sweet 擁抱,happy ending,劉俊謙氹女有一手!


----------------------------

【壹週刊 武漢肺炎專頁】

緊貼防疫資訊!口罩訂購情況、確診個案、病徵潛伏期、封關國家名單、保險點賠?

與你遠離瘟疫 睇清官謊!

立即睇

-----------------------------

【壹週刊直播平台 ChannelNEXT】

專家教你自保攻略|口罩點揀|防疫點做

立即睇

-----------------------------

疫情追蹤,最新消息,Follow 壹週刊Telegram:

點擊追蹤