• 【非攻】瘟疫科學發展觀(黃秋生)
  • 2020-03-16    

 

幾個月前,有人問我抗爭點樣先會完結。我話根據歷史嘅規則呢 —— 其實歷史冇乜規則,嗰啲講乜嘢科學歷史觀嘅人全部都係老千:蒙古帝國因為黑死病全部瓦解,白癡做皇帝又有,文盲打出個帝國又有,大無賴劉邦建立漢帝國,到依家中國人都稱自己為漢人,斐廸南大公落車睇下俾人殺死埋,引出第一次世界大戰。有乜規則可言?講科學歷史觀嘅,都係巫毒科學。

所以,根據歷史規則呢⋯⋯我認為除非有戰亂或者瘟疫,如果唔係抗爭都幾難會停。但係戰爭,除非中共真係傻到去打台灣(不過真係好難講,佢哋啲嘢估唔到);至於瘟疫,冇咁啱啩?所以話歷史發展冇規律嘅,就係咁啱,不過大家應該慶幸唔係戰爭而係瘟疫。我把烏鴉嘴嚟,由細到大都係衰嘢開口中,以前我阿婆好怕我亂咁噏。

點解我認為有瘟疫,抗爭就會完呢?因為一般嚟講,兩班人喺間屋度打交,如果忽然火災,係咪一齊救火、救命先?所以又話歷史冇必然,正常人喺咁,可惜呢個世界唔正常人好多,我哋好彩遇到嘅係瘟疫唔係戰爭,唔好彩遇着個特別低能之首,抗疫慢八拍,口罩又買唔到 —— 人哋阿澤又買到,誠哥又買到,連茶餐廳都買到(當然唔係喺香港買啦),係佢買唔到;封關又封啲唔封啲,唔知佢真癲定假傻(假傻多,黑心就一定),幸好香港人喺沙士中過招,衛生意識高,抗爭半年,自救能力超强,危而不危,疫情未有大爆炸。

哈!佢又走出嚟認屎認屁,當係自己功勞,佢唔係無知就係無恥,是旦揀樣啦!所以歷史只可以睇常態,唔可以觀變態。遇到神經病,歷史毫無規律可言,所以唔可以稱之為科學。正常人遇到危險會避開,無知者會停低睇熱鬧,甚至會行埋去;一加一等於二,偏偏就有期期考第一嘅人話等於四。做啲唔做啲,一加一,等號後冇寫答案。

要公務員返工又冇口罩派,差佬就着到太空人咁,醫護裝備就唔夠,公務員又自己着衫,差佬返工使唔使自己買槍?乜嘢口罩如衣服,乳罩就係衣服。衣服?你去「姑池」買個今年米蘭最新款口罩睇下(依家意大利搞成咁,可能遲啲真係會有,我又烏鴉嘴嘞),滿嘴歪理,一加一等於四,乜唔係呀?一個二加另一個二,咪等於四囉,好好笑呀依家?蛋餅強又係咁,你又係咁,成班蟊賊。本來正正經經處理好疫情真係可以帶來一點生機,依家做咗棟篤笑,冇啦。仲話期期考第一,一加一都計唔到,好似我阿婆鬧我咁,讀屎片!

作者簡介:

黃秋生,字秋生、號秋生哥、影帝、黃哥、黃老師⋯⋯等等。香江灣仔人也,生時,毫無異象,亦無大蛇入屋,只見呱呱墜地,肥肥白白。時值仲秋,因而為名。幼時,頑劣不堪,教而不善,精力過人,常上山下海,破壞王也。未冠,變本加厲,不學無術,言不及義,好行小慧,目中無人。秋少負氣節,立志遠大,唯願終生無所事事,游手好閒,不勞而獲,好食懶飛。及後,竟因緣際會,負芨演藝學院。風起雲湧數十年。到如今,千帆過盡,一事無成,落花流水春去也。唯一生愛看書,雖不求甚解,無立德立言,然亦未作低三下四,奴顏婢膝之事。足以慰平生,曰:人也!


----------------------------

【壹週刊 武漢肺炎專頁】

緊貼防疫資訊!口罩訂購情況、確診個案、病徵潛伏期、封關國家名單、保險點賠?

與你遠離瘟疫 睇清官謊!

立即睇

-----------------------------

【壹週刊直播平台 ChannelNEXT】

專家教你自保攻略|口罩點揀|防疫點做

立即睇

-----------------------------

疫情追蹤,最新消息,Follow 壹週刊Telegram:

點擊追蹤