• 【武漢肺炎|炸兩俠滯日】一個刁民在日本的經歷|陳雲海
  • 2020-03-07    

 

以下呢個經驗比較長,大家希望可以耐心小小慢慢睇,你就當我一個香港刁民喺外地遇到嘅情況!

話說3月5日下晝,突然收到消息,話日本政府將會強硬執行由中國、包括香港澳門入境嘅人士強制十四天隔離!身邊好多朋友已經聯絡我,問我情況點?我真係一頭霧水!完全理解唔到點解之前日本政府對疫情 Hea 到爆,甚至我認為所有日本武漢肺炎確診數字都係假嘅時候(因為我認為日本政府為咗東京奧運會會不惜一切,包括做假!)突然間強硬到咁,而且講到明會暫時取消香港人嘅日本免簽證(後來知道包括特區護照同埋BNO持有人),咁我就即時要諗辦法離開 —— 我係因為有事情,一個月內兩次要去福島核電廠附近「考察」!

雲海於昨天親往香港政府駐東京經濟貿易辦事處

原本 3 月 5 日我由福島返東京,喺香港訂唔到 3 月 6 及 7 號嘅回程機票,就唯有訂 8 號啦!但黃昏嘅時候,日本政府確認所有強行實施隔離政策係由 3 月 9 日開始,咁我坐 3 月 8 號傍晚六時十分日本航空班次回香港,咁就剛剛「擲界」了,我聯想到,若果這班機深夜十二點後到香港,根本就冇人會乘坐同一班機返去日本,其實取消嘅機會好大。

咁好啦,我就嘗試接觸日本航空公司啦。好嘢到呢,首先根本完全打唔到電話俾佢哋,佢哋網站亦都刪除埋原本有嘅電郵地址!再喺網站上寫明:「依家太多人接觸佢哋冇辦法會回覆之類!」咁即係點呢?若果 3 月 8 號班機取消咗,之後短期內都好難返到香港!而我有一個難處,就係 3月 9 號下晝,要去醫管局旗下嘅診所攞藥,其實我已經帶晒所有藥去日本,但只能捱多一個禮拜左右!咁點算好呢?

我即刻去查東京飛關島、再由關島飛香港嘅航班,呢個係我之前諗定嘅 plan B,美金都帶足啦!點知原來關島直飛香港嘅航班已經取消晒,一定要經馬尼拉,咁一來菲律賓對港人都有隔離限制,二來人質事件之後,我話咗以後唔會再去菲律賓!咁好啦!即刻去 check 東京飛曼谷、曼谷飛返香港嘅航線,正當想選擇邊班航空公司之際,就收到消息話泰國對港人亦都執行十四天隔離令(後來消息就更加混亂)莫講話泰國消息混亂,其實日本呢邊嘅消息更加亂:首相安倍講嘅嘢,同外相、厚身省講嘅嘢可以係完全唔同,而且冇一個標準或者統一說法!

我第一時間諗起嘅,梗係搵返香港政府駐東京經濟貿易辦事處啦,Google 到佢地址同聯絡方法,我就即刻打電話比佢哋,由 3 月 5 號 黃昏六點開始打電話打到九點,一係就冇人聽電話,一係就唔通,再睇清楚上面資料寫到明,佢哋辦公時間明明星期一至五都係二十四小時服務喎!原本諗住即刻飛的士過去,諗諗吓都係聽朝先。

香港政府駐東京經濟貿易辦事處說明牌上,寫着原來佢哋嘅辦公時間係上午 9:30 至到下晝 5:30,仲有一個鐘頭 lunch time 添!

到 3 月 6 號朝早 10點幾,我就坐的士過去,就遇上我其中一次最離奇嘅經驗:我去到正門,有一位日籍女職員即刻上前招呼我,仲幫我撳電梯,我已經覺得好奇怪,冇理由佢會知我嚟㗎?之後佢就問清楚我係咪相關職員(我諗佢以為我係香港政府派來嘅職員)我就話唔係,我只係香港市民,想來查詢問題!佢就面色一變,趕我出去門口個三角開門位,叫我自己撳掣上去啦!(嘩!冇禮貌到呢!)這女士之後從此就消失咗啦!

咁係我撳掣嘅同時,就見到塊說明牌上,寫着原來佢哋嘅辦公時間係上午 9:30 至到下晝 5:30,仲有一個鐘頭 lunch time 添!等咗好一陣子,先有人係通話機問我咩事?我就用廣東話好清楚咁講:「我係香港嚟嘅,想問關於日本政府而家嘅緊急狀態令之下嘅情況!」對方竟然用普通話同我講:「你等一下!」心都實埋!

我就企響個三角門口位起碼十五分鐘,不斷被開門冷風吹,直到一位聲稱係香港政府人員之香港人、識講廣東話嘅職員陳小姐落到嚟,用都幾唔好嘅禮貌問我咩事?之後仲要唔俾我進入大門內任何比較冇咁大風嘅位置去問問題(原來咁樣對香港人嘅?!我交啲稅結果原來係咁嘅!)我於是乎就向佢發難,同佢講其實我依家係乜嘢都問唔到,仲有關於攞藥嘅問題,萬一飛機停航唔知邊個可以幫到我⋯⋯等等;但你估都估唔到個陳小姐點答我,佢話:「其實我哋呢個辦事處唔係立亂俾香港人可以嚟問嘢就問㗎!(嘩!)你係要預先打電話俾我哋做個 appointment,你先可以嚟㗎!不如上網或者打電話俾我哋做咗個 appointment 先啦!」

嘩!我真係火都嚟!我話:「尋晚打咗成晚電話無人聽電話甚至係冇 Voice mail,我點做appointment 呢?好啦我今朝特登坐的士嚟到現場,問你你竟然要我做返 appointment 先返嚟?!」之後陳小姐仲同我講,佢本身自己唔係屬於「查詢部門」嘅同事嚟㗎,而本身畀香港人查詢個部門,原本識講廣東話嗰一位職員咁啱今日唔辦公,上面工作嘅同事全部係講日文同英文,若果我堅持要用廣東話問,就幫唔到你囉!

仲有仲有,其實你哋香港人唔應該搵我地囉,你應該自己打 1823 囉!(其實佢不斷講 1823 我諗佢係講錯咗,其實佢係想講 1868 入境處熱線?但我已經冇心情修改佢)嘩!之後佢再強硬地繼續講:「陳生!你冷靜啲先!」(呢句真係所有公務員嘅死穴!)我就即刻爆佢:「尋日日本政府突然間頒發緊急狀態令,我哋而家喺日本嘅香港人乜都問唔到,你電話有冇人接!仲要上面寫到明你係廿四小時運作(後來所有職員都否認呢個說法,仲要聲稱唔知道 Google 咁樣寫,我離開後佢地會向 Google 提出修改變返做佢哋嘅辦公時間)而家你仲要我去做 appointment 問問題,你仲命令我去冷靜?!」

香港政府駐東京經濟貿易辦事處職員陳小姐:「其實我哋呢個辦事處唔係立亂俾香港人可以嚟問嘢就問㗎!其實你哋香港人唔應該搵我地囉,你應該自己打 1823 囉!」

之後我繼續爆:「你都幾好嘢喎!我有好大對比囉!同樣係香港政府經濟貿易辦公室,喺武漢嘅同事,就可以幫湖北省嘅香港人要藥有藥、要食物有食物、要飛機有飛機、要運輸有運輸、要返香港有返香港,而且全部免費!同一個部門對住日本嘅香港人連打個電話都做唔到!呢個落差巨大得滯啦掛!」陳小姐好似覺得應付唔到我,就想返 office 話聲稱會搵佢哋嘅負責人同我講!

好!我等!大概十分鐘之後,一時就話俾我聽,得一個廣東話嘅職員;一時就成隊講廣東話嘅職員落晒嚟,包括佢哋嘅辦公室老頂胡鉅華 (Thomas Wu) 以及五位來自香港嘅入境處同事!(唔知係咪我話我係 Henry Chen 觸動到佢地神經呢?)

胡生好似做大龍鳳咁,一落到嚟,就大大聲同我講:「陳生,唔好意思!我哋頭先上邊傾緊所以冇落嚟了解⋯⋯!」我即刻插嘴:「我諗我唔使再企喺個三角風口位度吹風,可以入嚟大堂囉可?」我哋所有人之後都企喺大堂張枱前面,因為連一張凳都冇㗎!(真係好想知道駐東京辦事處嘅財政撥款有幾多?)胡生想同我握手,我就話防疫時間唔好啦!我於是繼續向胡生發難,都係表達同一個部門的駐武漢同駐東京分局,對港人嘅處理方式係落差咁大?連一個應變小組或者電話都冇?

香港政府駐東京經濟貿易辦事處日籍職員印咗一張香港入境處 1868 政府熱線嘅簡體字版資料俾雲海參考!

當然胡生亦都表達,其實佢哋尋日知道日本政府嘅公布後,都完全掌握唔到最新情況!同埋希望幫到我,若日航取消班機後,我攞藥嘅問題,佢哋開頭就已討論啱啱過嚟嘅入境處職員,會唔會呢兩日幫我攞到,但時間上做唔到,但係佢哋完全唔覺得 3 月 9 號之後,會可以幫我寄到藥過嚟(唔知點解湖北又做到個喎?)佢哋就話,若我真係滯留喺日本暫時返唔到香港,會帶我去睇日本嘅醫生,請日本醫生方面幫我開藥(當然係我自費啦!)而且佢肯俾佢自己嘅卡片及聯絡電話我,有咩事可以搵佢求助,我不得不承認佢嘅公關手段係好好多!

但我都向佢強調,滯留日本唔係得我一個香港人,有咩事要搵佢地求助,並唔應該得到咁樣嘅待遇,基本嘅電話查詢都冇?連電話錄音都冇?之後胡生同幾個入境處職員都同我講:「其實你哋最好有咩事,都打返入境處嘅求助熱線 1868 啦!」我即刻打蛇隨棍上話:「1868 求助熱線我交過好多次手㗎啦!我唔能夠話佢哋係廢!不過真係完全唔掌握情況,同幫唔到手囉!仲要係某程度上,佢哋都要聽命於保安局嘅指揮,呢下我覺得好離奇㗎!點解入境處自己唔可以話事嘅呢?太多擲界嘅權力問題!」

現場所有人就好尷尬咁望住我,唔知講咩好。咁我就話:「都唔阻你哋繼續開會啦!若果飛機繼續飛就冇問題啦,我滯留喺日本的話,我就搵你哋幫手啦!」呢個時候一位日籍職員在樓上 office 衝落嚟大堂,表示已問咗日本航空公司,3 月 8 號傍晚六時十分果班飛機會照常起飛,而且仲印咗一張香港入境處 1868 政府熱線嘅資料俾我參考!我講句「唔該」再一睇張紙,係簡體字版(反眼)!

或者我喺湖北嘅話,待遇會好好多嘅!我作為一個喺日本嘅刁民,要辦公室嘅阿頭嚟招呼我,我都已經好唔好意思㗎啦!

P.S. 我剛踏出辦事處門口,就聽到胡生好大聲咁同佢啲同事講咗一句:「Well done!」我當時心諗,well done 咗喺邊呀?我講笑咁講啦,唔通成功將武漢肺炎惹咗俾我所以 well done?要知道全程同胡生講嘢,佢都係冇戴口罩㗎!企喺我半尺位右手邊嗰個入境處職員,都係冇戴口罩同我講嘢㗎,呢位職員係特登過嚟日本處理鑽石公主號港人嘅同事嚟㗎!講真!若果我之後真係惹到武漢肺炎,你都唔使問我源頭!

香港政府駐東京經濟貿易辦事處代表胡鉅華(綠衫者)政府圖片


作者簡介:

雲海,全名陳雲海。傳媒界的頑童,有些不受控;喜歡周遊列國尋幽探秘,除了愛探索古靈精怪東西之外,也熱愛尋求社會真相。投訴是另一種嗜好,別人稱他為「炸兩俠」!


----------------------------

【壹週刊 武漢肺炎專頁】

緊貼防疫資訊!口罩訂購情況、確診個案、病徵潛伏期、封關國家名單、保險點賠?

與你遠離瘟疫 睇清官謊!

立即睇

-----------------------------

【壹週刊直播平台 ChannelNEXT】

專家教你自保攻略|口罩點揀|防疫點做

立即睇

-----------------------------

疫情追蹤,最新消息,Follow 壹週刊Telegram:

點擊追蹤