• 【生意大跌照買400萬法拉利】撐警沈嘉偉累I.T被杯葛 店舖經理爆:九成前線「偏黃」感失望
  • 2020-03-04    

 

上月中,晨曦明星足球隊與警隊的「無罩宴」短片在網上瘋傳,當中除了有警務「一哥」鄧炳強、總警司謝振中、用警棍襲擊途人的退休警司朱經緯、成龍、曾志偉、譚詠麟、張智霖及方中信等人出席外,有眼利網友更發現時裝王國I.T(999)老闆沈嘉偉也在場,站在其老友張智霖身旁聽歌拍手。網民因而發起杯葛I.T大行動,杜汶澤更在facebook出post指:「你啲衫留返畀藍屍做壽衣」,呼籲大家罷買。

有在I.T工作超過十年、現管四間分店的店舖經理向本刊爆料指,集團有近九成前線員工立場「偏黃」,對於老闆出席該飯局均感愕然及失望,表示有熟客向他們談起飯局一事都只能無奈回應:「我哋總唔能夠迫人買嫁嗎,客人有權按政見選擇買定唔買。」面對零售寒冬,I.T的辦公室員工已由2月起放無薪假,復工之日遙遙無期;而沈嘉偉的世紀撐警舉動,更如與民為敵,進一步令集團形象插水,生意隨時一鋪清袋。然而,當員工都在捱世界時,沈嘉偉仍照買靚車,包括在去年以逾400萬買入全新法拉利,生活依然富貴。

APM新現第一滴血

I.T在去年8月率先發盈警,2019年中期業績由盈轉虧,錄得7,195萬元虧損。期內收入按年減少1.2%至40.15億港元,當中香港及澳門市場收入減少6.2%;集團亦由2018年同期持8.18億元淨現金,大跌變淨負債1,500萬元。

以往I.T聲勢浩大,2013年高峰時,曾在全港開設295間分店;不過同年8月,集團就發盈警,而香港的營業額緊接倒退。I.T於翌年重整旗鼓,大關20間分店,惟同店銷售增長仍節節後退。時至去年11月公布的數據,其香港分店數目已下調至只剩205間。

事實上,I.T分店結業潮依然未止,屹立於觀塘APM近15年的大型i.t分店突於上月中圍上膠板,宣佈結業。該店位於商場C層2&16號,屬連接港鐵出入口的旺位,人流甚多。在I.T自家品牌店工作超過10年的店舖經理Miko(化名)接受電話訪問指,本港整體生意由去年6月開始減少,「開頭未算跌得好勁,係後來有罷工,同埋少咗內地人嚟後先明顯大跌咗三、四成;到而家更嚴重,累跌近五成生意。」

她補充:「APM分店雖然執咗,但就無炒人,員工調晒去其他店幫手。」Miko指前線暫未受影響,現時每人每日可獲取一個免費口罩上班,不過就有甩轆,「其實公司有訂到口罩,好可惜應該訂錯咗,佢哋好似經日本供應商買,供應商本身寫係高防口罩,但到港後有同事識日文,睇到發現唔係高防。」站在店面日日對客,部分員工為求安心,則寧選擇自備高防口罩上班。

員工呻撐警後生意更差

留下來的店舖,生意同樣不見得好。記者上週到APM視察市況,發現I.T的自家品牌b+ab、Fingercroxx及FIVE CM等相連店明顯「拍烏蠅」,在中午時段只見sales們行行企企,半小時間亦不見有客走進,更莫說開單。即使I.T現正進行轉季清貨大優惠,三件貨品有額外八折,減價價錢再享折上折;變相一件700多元的衛衣最多可減至近兩折的100多元就有成交,但折扣再多也難起作用,以往人頭湧湧爭平貨的情景已不復見。

有APM員工輕嘆:「反送中時都有人流,但爆肺炎後就真係無晒人啦。」在疫情肆虐下,前線員工都深明市道轉差實屬避無可避。不過,沒想到令生意雪上加霜的卻是因為自己老闆的言行。問到沈嘉偉撐警後生意有否更差時,員工明顯敢怒不敢言:「有,點都有影響,生意本身已經差啦,佢仲要出席飯局。」Miko亦指:「如果站在較黃員工嘅立場去睇,其實係失望嘅。但我哋老闆同張智霖咁熟,可能因為各方面原因去個飯局掛?」她指打工的別無他選,只好依舊盡好責任及本份。

皇牌Aape失守

2011年,I.T斥資2,000萬收購經營走下坡的日本Nowhere集團九成股權,成功點石成金,接手後把生意轉虧為盈。Nowhere持有不少日本潮牌,包括A Bathing Ape、Bape、baby milo、BAPE STA、URSUS BAPE及Mr.BATHING APE。憑住買起潮牌「猿人」,I.T得以一個系列撐起半邊天,如2016年本港生意大跌,錄得1.85億元虧損時,日本業務就愈做愈好,收入雖只佔總額一成,卻貢獻集團一半利潤達3.16億元。

為擴大市場,I.T於2012年創立定價較親民的副支線AAPE BY A BATHING APE(Aape),以猿人標誌及專屬虎紋迷彩圖案迎合年輕人口味。成為皇牌之一的Aape向來深受內地客歡迎,而其營運亦有別其他自家牌子,多年來企硬不打折以突顯潮牌地位,令顧客不會有「遲買平幾舊」的觀感,顯得新貨更為搶手。以往與其他品牌推出crossover產品時,門市更會出現排隊人龍。

惟近日可見,Aape的營銷策略已明顯有變;APM的員工力銷:「呢個牌子係今年先開始有折,而家做緊三件八折。」問到是否因為生意轉差而打破慣例時,他表示:「呢啲都係老闆話搞就搞,係佢意思嚟。」

Miko指熱潮在這兩年其實已見回落,「A Bathing Ape喺日本真係好好生意,而且定價比香港低,所以喺當地有吸引力。但香港租金實在太貴,以我所知呢兩年本港生意一般,有啲甚至cover唔到租金。」Aape現於香港有10間專門店,分別位於時代廣場、又一城、太古城及APM等一線商場,租金絕對不菲。

發跡後群居地利根德閣

今年52歲,住華富村出身的沈嘉偉發跡史甚為傳奇,學歷只有中學程度的他在1988年於銅鑼灣開設名為Green Peace的服飾店,靠賣水貨名牌起家。1999年,沈嘉偉與性感女星邱淑貞在東京結婚,女方被指十分旺夫,沈嘉偉的生意亦愈發愈大,公司最終於2005年上市,成為香港數一數二的時裝巨企。

沈嘉偉名成利就,有指其成長的華富村風水單位是關鍵之一;而其母則被踢爆在搬離該屋後,仍遲遲未歸還單位。在屢受批評下,單位最終於2005年因長期丟空而被房署收回。事實上,沈嘉偉在90年代已狂掃港島豪宅,包括於1992年以780萬買入半山帝景園一個中層單位,於2005年以1,860萬賣走,持貨13年賺超過1,000萬元。

沈嘉偉鍾情中半山的老牌豪宅,於1994年至2009年間先後買入過七伙地利根德閣單位,總涉資逾1.3億,當中有四伙單位分別由沈嘉偉、其弟沈健偉、其姊沈秀慧及其妹沈秀嫻居住;另有一伙於2005年時以1,550萬易手,賺350萬,其餘兩個單位仍然持有,相信是用以長期收租。
沈嘉偉鍾情中半山地利根德閣單位,現時仍持有六伙單位。

生意轉差 名車照買

除了磚頭,有「超級車狂」之稱的沈嘉偉手上名車多不勝數,據知他篤信風水,多數買黑色車為主。由於數量眾多,有傳名車因而要分散停泊在中環半山一帶的數個停車場裡。日前本刊就到過地利根德閣停車場直擊,發現沈嘉偉至少停泊了三部名車在內,最搶眼的一部是於2019年才出廠的法拉利Portofino紅色跑車,價值400萬元。另有一部是黑色保時捷911 GT2 RS,落地兩年,總價超過600萬元。隨行的半山地產經紀分享:「沈嘉偉住咗喺到咁耐,應該有好多車位,當中有啲可能係發展商賣畀佢,又或者係佢一見到有人放車位就入手。」除了居住屋苑外,市傳沈嘉偉亦有把名車停泊在I.T位於黃竹坑的辦公室大廈內。本刊曾到現場觀察,發現該廈車位屬業主擁有,甚少對外開放。雖然場內停泊了大量貴價車,包括約十部保時捷及數部越野路華,惟只有一部是沈嘉偉公司名下,另外兩部由明星任賢齊持有,未知所屬車位是否由沈嘉偉出租。

經營轉差,絕非一日之寒;沈嘉偉在生意縮水下,自己照舊豪買車,但就經常捽數,曾被指苛刻。去年I.T力推自家網上平台,以迎合新一代的消費模式,長遠彌補線下分店縮減的問題。當時有員工在網上爆料,指公司為極速增加網上會員人數,強迫每個員工要追夠一定數量的「網購單」;有些人為了達標,只好自己掏荷包購物。Miko解釋:「公司就住online shop係有定立target,同事都有配合去做,但可能太突然,又未必識點推介人用,上頭有要求我哋開單,有同事真係會自己開單,但公司不算有強迫。」然而,在層層遞壓的sales世界裡,追數就是大於一切。
集團去年中期業績由盈轉虧,不過沈嘉偉照舊豪買車,同年斥資400萬購入全新法拉利。

過去數年I.T業績平平,2015年集團純利大跌三成,主席沈嘉偉與執董胞弟沈健偉因此無花紅分,不過二人仍各袋過千萬總年薪。翻查年報,沈嘉偉於2017年總薪酬達3,490萬元,前年因為花紅大跌而有所影響,不過照袋2,195萬元,相信生意再差,首當其衝受苦的亦只是員工。
沈嘉偉薪金由2009年的480萬元,增至2018年的819萬元。

撰文:黃綺敏

拍攝:廖健昌


----------------------------

【壹週刊 武漢肺炎專頁】

緊貼防疫資訊!口罩訂購情況、確診個案、病徵潛伏期、封關國家名單、保險點賠?

與你遠離瘟疫 睇清官謊!

立即睇

-----------------------------

【壹週刊直播平台 ChannelNEXT】

專家教你自保攻略|口罩點揀|防疫點做

立即睇

-----------------------------

疫情追蹤,最新消息,Follow 壹週刊Telegram:

點擊追蹤