• 【禁忌之林】廢老最多笨周融(林忌)
  • 2020-02-28    

 

「咦?乜咁啱呀?你又來……隔離?」Felicity想不到在隔離營也會遇到熟人。

「唉,唔好提啦,明明我已經做足安全措施,偏偏屋企老人家唔生性,拜佛拜出武漢肺炎,今鋪手停口停,都唔知隔離完點交租」John憤憤的說。

「你屋企人去咗北角嗰個咩佛舍呀?其實拜神唔係就咁入去拜兩下就走咩?點解咁都會中?」Felicity露出驚訝的神情。

「唉,你知班老人家,叫佢戴口罩,佢就大大聲反駁你,話『唔驚,使乜驚,要信政府』;終於肯戴啦,又聽埋咩戇居明風水師,話個口罩經過大師開光,可以戴幾日都唔使換;經過商場,又被成班Sales呃佢買咩OnQ水,話可以用來殺細菌,最後仲聽埋個神神化化的國師,買咗個唔知咩佛牌,再買佢推介嘅銀離子滅菌,於是咪照去佛堂食齋囉!我講佢都聽唔明病毒同細菌係兩樣嘢,唉!」John滿臉悔恨。

「我呢邊都唔好得你幾多,我地買晒啲最靚嘅口罩畀佢地,諗住夠佢用到疫情結束啦,點知佢話天氣好,最初就日日去行山,然後就又四圍去High Tea,又照去咩Wedding Banquet。叫咗佢唔好嘛,仲要成班連口罩都唔戴,然後痴痴呆呆,坐埋一枱開餐,做咩啫?」Felicity充滿怨氣地說。

「又唔肯戴罩?」John問。

「咪又係『阿叔食鹽多過你食米』、『阿叔做嘢唔使你教』、『當年沙士嗰時你只係一粒懵卵』之類嘅講法囉!平日班『廢老』已經夠難頂!嗰班條命生得好,只因為屋企有家底的『廢老』就更加難頂!佢地自以為巴之閉,自己有錢、有權、有勢,咪好似林鄭個衰款咁,覺得自己係超人,係唔會中病毒嘅!覺得係你班弱智、刁民、賤民、先至會中武肺病毒!我地呢啲上等人,出入香港會、賽馬會、遊艇會,全部都係Blue Blood高貴人士出入嘅地方,又點會中病毒呀?連待應都唔敢問,點解你唔戴口罩啦?搏炒呀?」Felicity忍不住提高了聲線。

「佢地以為有錢就唔會中招?早兩日個富婆,唔單止外傭中招,連隻狗都成為全球首例中招!佢地唔係以為有錢就唔會中呀?」John一臉驚訝。

「個富婆咪周融個姪女囉!明知自己有病,期間睇咗五六次醫生都仲要四圍走,佢係全心去播毒,定係想攬炒先?唔通佢係手足?想攬炒埋權貴同周融?」Felicity忽發奇想。

「周融!我梗係化咗灰都記得佢啦,佢咪人辦囉!早幾年在電視鬧後生仔係廢青呀嘛,鬧網民係『社會失敗者』,然後幾十歲人連大學學位都冇,仲夠膽厚面皮申請廣播處長!畀大家笑係為佢度身訂造──政府降低學歷要求喎!好心啦,幾十歲人就考返個大學學位啦,冇料又恃老賣老,香港咪就係呢班廢老阻膠住晒囉!」」John一提起周融就激動非常。

「係囉,咪就係呢班廢老最多嘢講,低學歷帶來嘅就係無常識,專門傳埋啲藍絲假消息!嘩,今次風水佬話叫電視台播龍珠可以辟毒,唔知佢地係咪真係信呢?」Felicity忍唔住笑了出聲。

「成日叫大家去中國發展,搞咩大灣區呀嘛,咩一小時生活圈,拎咩內地居住證,一個武漢肺炎,成班又忽然唔願做中國人,又改口話自己係香港人,要特區政府救佢地返來?又話不造謠、不傳謠、不信謠,做咩講到武漢而家好似人間煉獄先?信政府,做中國人,就唔好叫香港包機啦,留在武漢做個堂堂正正嘅中國人啦!」John說罷仍停不了心中那怒火……

「啱呀啱呀,今鋪真係多得呢班廢老呀!」




----------------------------

【壹週刊 武漢肺炎專頁】

緊貼防疫資訊!口罩訂購情況、確診個案、病徵潛伏期、封關國家名單、保險點賠?

與你遠離瘟疫 睇清官謊!

立即睇

-----------------------------

【壹週刊直播平台 ChannelNEXT】

專家教你自保攻略|口罩點揀|防疫點做

立即睇

-----------------------------

疫情追蹤,最新消息,Follow 壹週刊Telegram:

點擊追蹤