• 【換肺生死戀|逝世前愛的宣言】剩4週命買戒指求婚 犖晴未婚夫:下一世再做夫妻
  • 2020-02-26    

 

經歷高山低谷,等候屍肺移植24歲女生吳犖晴,二月下旬成功換肺,家人戰戰兢兢迎來盼望。一個月後,卻傳來惡耗,消息指她肺部受感染,今日上午病逝。犖晴的未婚夫在她動手術前,曾向《壹週刊》娓娓道來二人愛的故事。



他們故事比韓劇更曲折淒酸,卻活生生地發生在現實世界,縱沒有富二代只取一瓢,卻有個小子在她命危時撲去買戒指求婚,這個癡情種叫阿健。

她勝過自己

換肺之前,犖晴與死神搏鬥了兩個月。抽走心臟積水時劇痛掙扎、精神緊繃下無法入睡,如斯折磨下意志早該迷離,她卻深深記住鄰床病患是如何呼出最後一口氣,病房內的人流轉率又有多高,「佢同我講,望住一個個走,好驚。我驚佢瞓唔著搵我,都唔係好敢瞓,有時又會睇佢whatsapp最後幾時上線,係咪好夜都未瞓。」

犖晴有次險些踏入鬼門關,醫生雖搶救成功,卻囑家屬和阿健要有心理準備,預言犖晴生命僅餘四星期。阿健大腦當機,回過神來時已身在金舖,他毫無猶豫買下戒指求婚,「我叫犖晴要快啲好返,其實心入面就同自己講,下一世都係要娶佢。」

有缺陷才完美

是一時衝動,還是寄予犖晴求生希望?阿健說,早在表白當天已知道犖晴患有再生障礙性貧血,雖無預想過她會在幹細胞移植手術成功後、看似一切漸入佳境時,老天爺會再開個玩笑,打碎即將成形的幸福。犖晴出現併發症,有心包積水及肺高壓等問題,肺功能喪失,靠人工肺續命。

問及有否一刻自私,後悔那麼年輕就許諾終生,阿健沉思一會,「唔後悔。的確,有時候心入面會埋怨,要大清早去醫院其實好攰,但最攰嘅人始終係犖晴。」

「佢係女友型,同時都係老婆型。因為佢嘅病,令佢比一般人更識得珍惜,亦令佢識得照顧人感受,同佢一齊係好溫暖窩心嘅事。其實係我高攀佢。」

互相依賴影響

比不上,是因為犖晴的大學學歷,亦因為她的受歡迎程度。但原來平日笑得無憂的犖晴,心底仍因病情而自卑,怕為伴侶帶來麻煩被嫌棄,「我同佢講,不如拋開顧慮,試咗先啦」,於是兩人一路走來兩年半,愈來愈習慣對方,割捨不了。

「以前我係冇尾飛陀,想去邊就去邊,同佢一齊之後學識互相報到。我都開始有好多計劃,計劃佢幾時康復,成為一個正常人,亦會同佢計劃未來嘅屋企要點佈置……我哋只想組織一個平凡嘅家。」

採訪:陳因

攝影:胡堅

剪接:鄧詠瑤


----------------------------

【壹週刊 武漢肺炎專頁】

緊貼防疫資訊!口罩訂購情況、確診個案、病徵潛伏期、封關國家名單、保險點賠?

與你遠離瘟疫 睇清官謊!

立即睇

-----------------------------

【壹週刊直播平台 ChannelNEXT】

專家教你自保攻略|口罩點揀|防疫點做

立即睇

-----------------------------

疫情追蹤,最新消息,Follow 壹週刊Telegram:

點擊追蹤