• 【武漢肺炎】楊冪捐20萬人仔被嫌少 大陸網民鬧不停
  • 2020-02-08    

 

武漢肺炎漫延後,中國各省各市的人都對武漢人、湖北人喊打喊殺,又追又趕。唔只咁,連網路大軍都四圍開闢戰線追擊藝人,唔係鬧呢個唔愛國,就係叫嗰個滾出中國。估唔到,連楊冪都成為被圍攻目標。

是咁的,肺炎疫情嚴重,好多明星藝人都慷慨解囊,楊冪都唔例外,透過李連杰發起的公益基金會《壹基金》捐款。

無耐之後,《壹基金》披露藝人捐款名單以及金額,其中鄧超、孫儷夫婦捐30萬人仔,劉亦菲20萬,《倚天屠龍記》飾周芷若的祝緒丹10萬。佢哋無事,被讚人靚心善。偏偏都係捐廿萬的楊冪,被好多大陸網民話佢大紅大紫賺得多,嫌佢捐廿萬太少,口誅筆伐鬧不停。

楊冪被鬧之後未發一語,亦無其他行動,就已經令鬧佢的網民收晒聲,事關呢班網民實在太傻太天真了,竟然忽略咗捐款名單入面一間捐咗100萬嘅《嘉行傳媒》,其老闆正正係楊冪。

之後楊冪更靜雞雞捐多次。佢正在拍攝的新作《謝謝你醫生》,其劇組喺微博表示已捐50萬,而主演嘅楊冪亦額外再捐10萬。

楊冪從頭到尾無出過一句聲回應網民謾罵,低調捐款解決事情,真係有種「攞錢塞住你哋把嘴」嘅威水Feel!然後大陸網民又歡天喜地咁歌頌「公益之路楊冪從未缺席」、「真女神」、「萬眾一心馳援武漢」。活喺平行時空?乜唔係對武漢人喊打喊殺咩?

-----------------------------

【壹週刊直播平台 ChannelNEXT】

專家教你自保攻略|口罩點揀|防疫點做

立即睇

-----------------------------

疫情追蹤,最新消息,Follow 壹週刊Telegram:

點擊追蹤

----------------------------

【升級壹會員登記站 為你解疑難!】

親臨旺角做升級壹會員,即送「香港人:抗爭之夏」限量明信片

詳情地址