• 【禁忌之林】搶廁紙的天才與白痴(林忌)
  • 2020-02-07    

 

「嘩,班人係咪傻㗎?廁紙都好搶?唔通廁紙可以當口罩用?哈哈哈!」

「係囉,唔止搶廁紙呀,仲搶M巾𠻹呀!嗰日我見到個麻甩佬推住一車M巾,唔通佢諗住用M巾笠頭?哈哈哈!」

「嘩!你睇TVB受訪嗰個阿嬸講乜?佢居然信咩中國封關然後冇米賣喎,傻都知香港食米來自泰國多,中國都得嗰7%,有咩好驚呀?哈哈哈!」

「我有十盒N95,廿盒外科口罩,三十盒KF94,你可以嫁畀我了。」

法律界嘅Sabrina,冇理到Facebook上所見到的冷嘲熱諷,繼續指揮着佢嘅外傭兵團,從渣甸山間超市全力搬貨,親自駕駛佢嘅座駕,把幾十罐罐頭,廿排廁紙等雜貨運返家中。

男主人James回家,見到客廳仍有如未執抬嘅戰場,忍唔住問:「嘩,使唔使呀?老婆你做乜搬咗半間超市返屋企?你唔係信嗰個咩 whatsapp消息,話超市冇貨供應呀?我都立即 message 咗阿Victor,confirm佢哋其實大把貨,只係一時三刻運唔到上去之嘛,使乜咁緊張先?打仗呀?」

Sabrina 忍唔住提高聲線問:「你究竟有冇睇 message?你究辦有冇睇袁國勇在報紙講乜嘢?」

「有呀,咪140萬感染呀嘛!唓,使乜驚!啲專家都成日估錯啦!」James 一副極不耐煩的態度。

「係呀,唔使驚,有政府,使乜驚?你幾時跟陳家佩返武漢打卡?去完記得同佢私奔,唔好返屋企;你個 Auntie 潘話二月返武漢公幹,去咗未?」Sabrina冷嘲熱諷。

「係啦係啦係啦,我之前低估疫情,我認錯啦,但係你搶廁紙做乜?140萬人感染同搶廁紙有咩關係?我又唔使廁紙包頭!」James轉移視線問。

「我問你有冇click入去睇內文呀,除咗140萬人感染之外,你仲睇咗乜嘢?」Sabrina一副等睇好戲嘅表情。

「喂,你分明玩我啫,你都知我每秒幾千萬上落,知個病好嚴重就飛過啦,有咩咁特別先?」James繼續撐。

「袁國勇在1月1號,話香港會好似SARS的機會好微;1月21號,話相信中國冇隱瞞疫情;一個咁親政府,咁撐中央立場嘅專家,去到2月1號,竟然話140萬感染之外,係香港要死14,000人呀!SARS都只係死299人,武漢肺炎香港要死14,000人,你明唔明呢個數字代表乜嘢呀?」

「1月28號,梁卓偉話預計香港的疫情要頂峰,唔係3月,唔係4月,係5月呀!然後希望6、7月時會慢慢減弱,請問今日幾多號?屋企得返幾多個口罩?你打算未來嗰5個月,要去超市買幾多次餸同雜貨?你有幾多個口罩畀Maria用?到時Maria病咗邊個煮飯畀你對仔女食?邊個帶隻狗散步?用乜嘢幫你隻Bruno執屎?」 Sabrina 忍唔住來了個總爆發,繼續說:「出去買口罩,排隊買廁紙、漂白水,就要用一個口罩;買唔到返屋企,就蝕一個口罩,你在Amazon買嗰堆口罩,畀人Cut剩幾多張單?又話月尾有貨到,點解等咗咁耐都冇先?」

「你入貨我唔反對,我只係質疑你點解要聽下師奶講就信!你冇聽到邵家輝講,有人謠傳假消息咩?你冇聽政府呼籲,叫大家要冷靜咩?」James當然要撐商界嘅自己友。

Sabrina實在忍無可忍:「好心你班商家佬唔好再自欺欺人啦,香港今日搞成咁,就係你班擦鞋仔為咗聽西環話,由送中到武肺一錯再錯,搞到香港就來變死港!你自己落樓下望下!你個死鬼邵家輝以前選區個寶馬山超市,唔好講話廁紙、米與漂白水,家下連罐頭架都空晒!早在咩whatsapp消息傳出之前,Maria已經向我投訴話乜都買唔到!商會話冇短缺,叫佢補貨呀?補極都冇,即係代表乜嘢?就係個政府公信力掃地,就係用腳向你班友投不信任票呀!」

James繼續撐:「你都知我一樣唔妥個林鄭,佢真係又廢又一意孤行,其實我都唔撐政府,我政治中立嘅!」

Sabrina笑笑口說:「係呀,我知呀,但係你都係向西環跪低呀嘛,揀個八達通都唔識用,廁紙都唔識買嘅女人,仲要沾沾自喜,同人分享佢買唔到廁紙就坐的士返官邸嘅『趣聞』;好囉,而家大家最開心啦,揀着個攬炒之母,商界自己食返晒,到今日都唔肯全面封關,你信下星期鋪頭唔使閂門?你到時仲敢唔敢返中環Office?你仲敢唔敢同班Banker去食飯?你繼續政治中立啦!」

「……食飯啦。」James無言以對。

-----------------------------

【壹週刊直播平台 ChannelNEXT】

專家教你自保攻略|口罩點揀|防疫點做

立即睇

-----------------------------

疫情追蹤,最新消息,Follow 壹週刊Telegram:

點擊追蹤

----------------------------

【升級壹會員登記站 為你解疑難!】

親臨旺角做升級壹會員,即送「香港人:抗爭之夏」限量明信片

詳情地址