• 【中環人語】陳肇始何須哽咽 雞珍有辦你睇
  • 2020-02-02    

 

局長上場後例牌上演「哽咽騷」、陳帆之後輪到醫管局主席范鴻齡,再由陳肇始接棒,新正頭哭哭啼啼「喊衰晒」有乜好呢?家陣做官又唔使講能力嘅,唔使驚保唔住個位噃。計小宗話,最緊要有官運,學得前衛生局局長陳馮富珍咁,就官運亨通!97年H5N1禽流感爆發,雞珍同大家講:「我日日食雞。」使乜驚呀?「雞珍」呢個朶從此風行全球,03年沙士爆發,雞珍同樣叫人唔使恐慌,但被踢爆唔肯去淘大花園視察疫情,對在廣州已爆發疫情後知後覺,香港埋單冇咗299條人命,包括謝婉雯醫生。但冇緊要,官運亨通嘅雞珍獲得當時嘅世衛總幹事李鍾郁睇起,隨即出任世衛助理總幹事,從此駐瑞士日內瓦。行運一條龍嘅雞珍,個老頂李鍾郁06年突然中風釘咗,咁就由雞珍坐正世衛總幹事呢個位,令唔少香港醫生又妒忌又羡慕。雞珍坐係世衛期間,好勤力咁出差,尤其係非洲,被世衛內員工踼爆,坐頭等艙又住酒店總統套房,掌政期間世衛每年出差使費達2億美金,使公幣以配合阿爺係非洲一帶嘅統戰工作,不過2014年非洲爆發伊波拉疫症,雞珍被批反應慢,最終死過萬人。係阿爺眼中,人命又何價呢,最緊要成功將世衛總幹事交棒予自己條,非洲佬譚德塞,那怕係伊波拉或武漢肺炎,總會㩒得住。獲阿爺重點提拔嘅雞珍退落世衛後,仲升上神台做政協常委,成為首個「超齡」政協常委。

所以,有運行既又何須哽咽?冇運行既哽咽都冇用!

撰文:宗菁華

-----------------------------

【壹週刊直播平台 ChannelNEXT】

全城抗暴 區區論壇同你深度剖析

立即睇

-----------------------------

【升級壹會員登記站 為你解疑難!】

親臨旺角做升級壹會員,即送「香港人:抗爭之夏」限量明信片

詳情地址