• 【武漢肺炎】中共照起埃塞俄比亞 世衞譚德塞盲目護主
  • 2020-02-01    

 

談起世界衞生組織,香港人除了其前總幹事──「食雞珍」陳馮富珍之外,就眼見近日世衞不斷擦中共鞋,不斷想淡化武漢肺炎,然後自打嘴巴,被迫升級的事實;只不過一星期之前,明明武漢肺炎已經在全球四處散播,偏偏譚德塞 (Tedros Adhanom),呢位來自埃塞俄比亞嘅總幹事,在1月23日仍然堅持武漢肺炎,仍然未成為「國際關注的公共衞生事件」;更把疫情風險只列為「一般」級別。

全球爆發疫症,去到歐美國家都照樣人傳人,一星期後世衞「死死氣」承認錯誤,自認「唔好意思,搞錯左,犯了人為疏忽」,風險應該係「高」而唔係「一般」(咁都錯得?),但在指引仍然堅持「唔使戴口罩」,指「目前冇證據」畀「非病人」戴口罩係「有用」──係囉,如果所有病人都會自動自覺戴口罩,唔會隱憂疫情,唔會隨地吐痰以及大小便,香港人咪唔需要戴口罩囉!唔知係埃塞俄比亞人好衞生,定係佢相信中國人好衞生呢?

前任總幹事陳馮富珍早前力讚,指世衞宣佈將新型冠狀病毒感染的肺炎疫情列為「國際關注的突發公共衞生事件」,為一個科學的判斷,是很謹慎及合理的決定。

全球播病毒,譚德塞仍然不斷擦中國鞋:「中國行動真有助預防擴散」、「習近平對疫情的認識、參與令我非常服鼓舞以及印象深刻」、「世衞反對任何針對中國的旅遊及貿易限制」、「武漢肺炎疫情並不嚴重,敦促國際不要過分反應,並反對各國撤僑」──全世界鬧爆,人地國家撤唔撤僑,關你咩事?人地國民死咗,係咪由你負責?世衞死死氣出來滅火,賴係中國新華社報導內容不代表世衞,指「撤僑係各國自己內政」­──咁當事人又唔直接反駁新華社報導?要人地追問先出來兜?

世衞嘅宗旨,係「使世界各地人們盡可能獲得高水準的健康」,主要職責係防止流行病,改善公共衞生以及醫療,偏偏對中國今次的疫情,不斷為中共死撐到底!好多人立即聯想起何志平的非洲「平民外交」之旅,衰咗在美國賄賂非洲塞內加爾前外長加迪奧而被判刑;而譚德塞的祖國埃塞俄比亞,正係中共的「一帶一路模範國」,其首都亞的斯亞貝巴,成街高樓大廈甚至掛住揮春以至紅燈籠,全靠中國資金興建;無論係埃國的公路鐵路,大部份資金都係由中共所借貸,截至2019年,接近20年期間中國向埃國借出121億美元,全國接近59%的外債,都是借自中國,簡單而言,沒有中共,就沒有今日嘅埃國政權,全賴中國錢幫佢地維穩。
世衞專家團隊曾赴華抗疫,譚德塞與王毅會面。

譚德塞在出任世衞總幹事之前,擔任埃塞俄比亞的外交部長,而當時埃國總統穆拉圖·特肖梅 (Mulatu Teshome),更係中共的老朋友──由1976年開始去中國讀書,直至1991年在北大畢業,連六四屠殺都身在北京,在中國渡過足足15年!1991年埃塞俄比亞長年內戰終於結束,原本親蘇聯的門格斯圖(Mengistu Haile Mariam)政權,被另一班共產黨人推翻,走假民主的「有X國特色的社會主義」路線,因此與同樣表面「社會主義」,實際上搞「國家社會主義」,亦即專制獨裁嘅中共一拍即合,路線相同,難怪「老友鬼鬼」。

2016年蔡英文當選台灣總統,食雞珍即配合中共玩嘢,取消台灣作為世衞觀察員嘅身份,踢台灣出世衞;譚德塞任後,即在2018年5月嘅年會變本加厲,連台灣傳媒都禁止採訪世衞大會,足證佢係中國嘅好朋友,連食雞珍都自嘆不如。

既然世衞與中國都唔歡迎台灣參與防疫,咁武漢肺炎又點解要台灣幫忙呢?明明中共與世衞踩到上心口,偏偏仲有人叫台灣人捐自己口罩去幫中國,自身難保都要救中共,呢種心態係咪似曾相識?係呀,就係以前嘅香港人囉,自己都冇得食,都仲要捐畀大陸嘅親戚呀嘛,捐左幾十年,仲畀人反咬一口,屈返轉頭話你當年竟然係全靠佢帶挈,再鬧你唔感恩,係咪一樣咁谷氣呢?

明知係咁,偏偏有人就係犯賤,捐畀呢類獨裁國家?究竟係捐畀佢地維穩,捐畀佢地打壓異見,定係捐畀班貪官?究竟有幾多落得到有需要嘅人手中?
全球播病毒,譚德塞仍然不斷擦中國鞋。

撰文:林忌

-----------------------------

【2019 區議會專題】

最齊全區議會入閘名單 互動民調

11.24 用選票重奪區議會

-----------------------------

【升級壹會員登記站 為你解疑難!】

親臨旺角、銅鑼灣做升級壹會員,即送「香港人:抗爭之夏」限量明信片

詳情地址