• 【疫市開業誇張過派口罩】譚小環茶記忠粉凌晨排隊搶頭位 王宗堯撐場即哄動
  • 2020-02-01    

 


譚小環與老公Eric(渣哥)另一心血傑作「大渣哥」茶記,今日初八終於試業開張,早前店舖外圍版大大隻字:「不反胃通知書,申請中……」夠晒爛gag,先聲奪人。今日開張,有忠粉真係倒尿咁早,於凌晨一點半已經排定隊,至清晨六點幾更出現人龍!唔知,真係以為佢地係排隊買口罩。

同港人齊上齊落嘅渣哥,前一日喺fb預告頭128名食客,獲派開運懷舊利是,雖然試業遇著疫症肆虐,但無阻一班忠粉鼎力支持,結果排頭位嘅黃先生,獲得有收藏價值嘅五百港元舊紙幣作為大獎,又能與小環合照,食客黃先生開心過去插頭柱香,佢攞住張五百元「舊鈔」話:「真係意外驚喜,呢張嘢會好好收藏,真係有今生冇來世。」好誇張喎!其餘嘅客人,亦分別獲得懷舊十元紙幣,及「硬嘢」五元同「一元」做紀念。

一開舖已經全場爆滿,忙到甩碌之下,老闆娘小環都要披甲上陣做埋樓面、水吧,甚至包裝外賣。其間小環攞住杯「凍啡小甜」繞場一週,最後都係送錯枱,老公Eric即搞笑解圍:「後生仔,唔好飲咁甜,呢杯凍咖啱你呀,收咗佢啦!」歡樂先生上身,咁識搞氣氛,客人冇投訴之餘,仲因為渣哥Eric嘅幽默,不時出現食客笑聲。

試業群情洶湧,排隊等位嘅人龍幾小時內未斷過,渣哥兩公婆老懷安慰啦!渣哥Eric:「真係好感動,試業撞正疫情嚴峻,本作好心理準備,人流可能打折扣,點知冇影響,啲客唔理天寒地凍,照嚟排隊,所以好多謝佢哋。」

茶記試業期間講明只做真.香港人生意,所以每個客人騷一騷身份證,量埋體溫,就安全入座。至於男神王宗堯中午駕到,一度引起哄動,當然亦成為好多食客嘅人肉佈景板,捉住影合照對於港府對抗疫嘅反應,渣哥點睇呢?「香港政府處理呢個疫情有幾出色就大家都知,唔需要我多講,我唯有講嘅係自求多福,大家小心啲,自己保護自己,等於父母唔理你,就要靠自己,雖然自生自滅,但都要求生。總之二百萬人要講嘅嘢,講咗好多次,費事再講。」

-----------------------------

【壹週刊直播平台 ChannelNEXT】

全城抗暴 區區論壇同你深度剖析

立即睇



-----------------------------

【升級壹會員登記站 為你解疑難!】

親臨旺角做升級壹會員,即送「香港人:抗爭之夏」限量明信片

詳情地址