• 【麗思卡爾w四季】武漢夫婦播毒自由行 新地酒店連中三元
  • 2020-01-31    

 

自從三年前肖建華喺四季酒店「被送中」人間蒸發後,對於好多大陸超級富豪來講,入住四季酒店都好有陰影,但事件就吸引唔少由大陸慕名而來幫襯嘅旅客, 好似新增證實中招嘅武漢七旬夫婦, 農曆年就帶埋病菌來港探親, 入住起碼四、五千銀一晚嘅四季酒店,又住埋對面九龍站嘅W酒店,同埋 Ritz Carlton麗思卡爾頓酒店,呢對武漢夫婦來港hotel hopping 本來好過瘾,不過新地(16)真係多得佢唔少, 呢三間酒店均屬新地旗下,呢鋪真係「連中三元 」,鬼叫啲大陸客咁欣賞旗下酒店咁咩 ?新地嘅酒店,好多都成為大陸客嘅「竇」,以往食住自由行呢條水,酒店、商場皆財源滾滾,唔愁無生意。四季酒店嘅「龍景軒」中菜廳 ,lunch hour 只係招呼酒店嘅住客 ,外來食客要兩個星期前訂位都未必有,Ritz Carlton 上面嗰間「天龍軒」 開張時仲巴閉, 要兩個月前訂位先至得 ,新地郭老太、郭炳湘生前都經常去巡視業務,郭炳江去年嫁女都係四季酒店搞cocktail酒會, 郭氏家族上上下下出力為酒店保持人氣。不過一切都俱往矣, 新地係沙田仲有間生不逢時嘅帝逸酒店,社會運動再加武漢肺炎,酒店業有排捱,呢啲就係單靠自由行一味嘅風險了。

撰文:宗菁華

-----------------------------

【壹週刊直播平台 ChannelNEXT】

全城抗暴 區區論壇同你深度剖析

立即睇



-----------------------------

【升級壹會員登記站 為你解疑難!】

親臨旺角做升級壹會員,即送「香港人:抗爭之夏」限量明信片

詳情地址