• 【非攻】未係最衰(黃秋生)
  • 2020-01-30    

 

多年前到巴西拍戲,因為戲中要講葡語,電影公司安排咗個巴西老師教我會話,學習之餘,大家吹水文化交流。

有日佢話,喺我哋拍攝附近嘅山區發生疫病,原來喺嗰個地區,有錢人住山腳,原住民同窮人住山頂。所謂山頂其實同香港完全唔同,山真係山,唔似香港從山頂到市區十五分鐘車程。巴西山區非常唔方便,水電都冇,資源又缺,山又高路又遠。

於是我問,咁政府點處理呀?疫情有冇控制住呀?我老師話,唔駛擔心,控制住啦。政府派咗軍隊在半山位置封鎖咗條路,唔畀人出入。吓?咁點呀?派醫療上去呀?困住晒啲人咪互相傳染?

佢話:「冇派人去呀,由得佢哋死囉,出一個,殺一個。」唔⋯⋯真係一山還有一山高。

當年我諗:話大陸冇人權?睇下巴西先啦。所以今次瘟疫我一啲都唔驚訝,都幾好吖,一封十幾個城鎮,一視同仁;仲派軍醫去搞掂你哋,空置房屋都唔用,係要用六日起間新醫院(而家趕唔切),之前又怕大家驚,唔公布疫情,真係愛民如子,好過巴西好多。

有人話,封城舉措人類歷史前所未有,我唔知佢啲歷史知識點學嚟,以前長春都試過啦,只不過當時唔係因為瘟疫,係因為要餓死自己同胞啫。中世紀黑死病時意大利又封過,米蘭仲封埋家,一發現有人染病,即時鎖佢同全家喺屋企自生自滅。而家中國比起中世紀同某啲國家,好好多啦。

正所謂,只要你唔考第尾,梗有一個衰過你。但係考第一?唔好諗啦,發夢啦!



作者簡介:

黃秋生,字秋生、號秋生哥、影帝、黃哥、黃老師⋯⋯等等。香江灣仔人也,生時,毫無異象,亦無大蛇入屋,只見呱呱墜地,肥肥白白。時值仲秋,因而為名。幼時,頑劣不堪,教而不善,精力過人,常上山下海,破壞王也。未冠,變本加厲,不學無術,言不及義,好行小慧,目中無人。秋少負氣節,立志遠大,唯願終生無所事事,游手好閒,不勞而獲,好食懶飛。及後,竟因緣際會,負芨演藝學院。風起雲湧數十年。到如今,千帆過盡,一事無成,落花流水春去也。唯一生愛看書,雖不求甚解,無立德立言,然亦未作低三下四,奴顏婢膝之事。足以慰平生,曰:人也!

-----------------------------

【壹週刊直播平台 ChannelNEXT】

立即睇

全城抗暴 區區論壇同你深度剖析

-----------------------------

【升級壹會員登記站 為你解疑難!】

親臨旺角做升級壹會員,即送「香港人:抗爭之夏」限量明信片

詳情地址