• 【中環人語|武漢肺炎】新世界「派罩」攞頭彩
  • 2020-01-27    

 

以香港現時社會氣氛,濶佬做善事都要講技術。 近排誠哥旗下嘅屈臣氏,50個口罩賣$49.9已經獲網民譽為「良心價」,想威過誠哥,必須要快、準、狠;家陣全世界都鬧口罩荒,正所謂一罩難求,新世界執行副主席鄭志剛(Adrian)年初三赤口就出咗條好橋,捐出$1000萬,揾人四出「班」口罩、搓手液同埋濕紙巾此「抗炎三寶」,派俾基層家庭同埋旗下員工,齊齊抗疫,亮點係以新世界個牌頭,四出去日本、韓國及泰國「班」啲來路貨返嚟,踏入鼠年,收到個日本口罩真係開心過一封大利是,新世界仲承諾「有貨即派」!有貨好、未有貨都好,已攞晒頭彩。按去年大財團捐地排位表,香港人可能唔駛咁驚「冇罩用」,因為新世界去年做領頭羊捐地,之後四叔嘅恒地、吳光正嘅會德豐,到郭氏家族嘅新地都先後捐地或借地,估計各大財團將效法新世界「派罩」。不過新世界嘅員工就過癮啲,事關公司緊貼國家政策,延長春節假期,至2月3號先至正式上班,期間可以home office,讓員工感受一下咩叫做「國家好、香港好」之政策。