• 【打工仔求生靠呢4隻字】2020職場必勝錦囊|張慧敏
  • 2020-01-12    

 

上一篇為大家找來特別猛人:香港科技大學Career Center trainer & Career Advisor 專家Grace講解未來招聘新趨勢好評如潮。乘勝追擊,再請 Grace為大家送多個錦囊。

Grace如是說:「2020係另一個十年的開始,飯畢竟要食,在職場巨輪內,大世界小宇宙,有險無險,無人可以避。計我話遊走江湖永遠兇險,好天必須斬埋落雨柴。時刻記住錦囊內四大關鍵字,希望幫大家喺 2020化險為夷,就是「世!事!多!變!」

「世」

Grace話:世界觀是也。今時今日,一部手機,一個網絡,大地在你腳下。唔好淨係諗本土,你嘅行業、產品、服務,如何衝出國際、惠及普世?

Son姐話:世事洞明皆學問,人情練達即文章。世界很大,機會無處不在,何必作繭自縛?跳出從來不存在的舒適圈,抬頭放眼看世界,才有機會看到不一樣的世界。

「事」

Grace話:做事做人,未識做人就先學做事。專注做小事,練好基本功,重複唔怕悶,沉澱揾竅門。如是者,洗碗都可以洗到出神入化,洗到世界級。

Son姐話:事在人為,休言萬般皆是命。有志者,事境成,大夢發幾多千秋都只是白日夢,永遠不會成為事實。講多無謂,實事求是,讓事實證明,讓結果說話。

「多」

Grace話:多試多學,多做跨界工作,切忌自設限。成件事可以係義工無壓力,例如現職 HR,可以幫中六生操練入學入職面試,或者寫下專欄如「職場奇人怪事獨立調查委員會」,試下自己張刀。做咗寫唔寫落 CV唔重要,更重要係廣結善緣,擴大貴人人脈。

Son姐話:多勞多得,冇勞冇得,是最正常不過的事。心多得唔得?冇話唔得,做人做事三心兩意,三分鐘熱度的人,你見過有成功的嗎?錢個個都想賺沒有人嫌多,不過請先問問自己憑什麼,好好學習什麼叫貴精不貴多!

「變」

Grace話:有無機械人都好,你個行頭都可以隨時消失,我地唔可以太「腦定」。永遠記得幫自己諗:手頭工作點可以變快啲準啲有效啲;自我提升方面,永遠不忘反思你嘅 transferable skills,你嘅技術能力除本行仲有邊行用得著?

Son姐話:易窮則變,變則通,通則久。在一個以光速運行的世界,變幻才是永恆,死抱完全過時的舊日的一套,不管是思維還是做法,一成不變,不變應不了萬變,被淘汰是必然,實情就是自殺。

Grace最後醒你:「世事多變,與其自求多福,不如自我成就。」

撰文:張慧敏

張慧敏 (Alison),人稱 Son姐,從「獵頭女王」成功轉型成為商企顧問公司CEO,由始至終的專業是憑一對慧眼看盡職場大小疑難雜症。正職是一對兒女的母親,從自身挫折和經驗悟出教養之道,不外乎以身作則。

個人Facebook 專頁:

https://www.facebook.com/HKcareerdoctor/

-----------------------------

【壹週刊直播平台 ChannelNEXT】

全城抗暴 區區論壇同你深度剖析

立即睇

-----------------------------

【升級壹會員登記站 為你解疑難!】

親臨旺角做升級壹會員,即送「香港人:抗爭之夏」限量明信片

詳情地址