• 【禁忌之林】高官驗腦委員會(林忌)
  • 2020-01-10    

 

香港已經再也拍不出笑片,因為現實嘅荒謬,遠比電影劇情更離奇;如果有編劇,敢寫出如此荒誕嘅劇情,觀眾會撕戲飛,會鎅爛櫈,但係我哋日日卻仍然要睇住呢班人渣日日亂噏,彷彿講少兩句會死咁。



1. 保安局局長李家超就在立法會內,指控反送中嘅示威者「曾受外地人提供訓練」,又指「文宣會有不同角度的版本,每次行動都有特定的目標及劇情,認為如此有組織的部署,不會是烏合之眾」嘅行為。



聽完果刻,我除咗想笑之外,更想講粗口。



李家超,綽號天竺比卡超,因在記招講錯颱風山竹做天竺,而得名。高官自己、弱智、廢、垃圾到不堪,「文宣會有不同角度的版本、每次都有特定目標及劇情」,呢句真係可圈可點呀!這不是常識嗎? 原來有常識,就係「有組織的部署」?呢隻「比家超」一個月收公帑月薪33.5萬?朋友,你返天竺食蕉啦!



因為一個弱智嘅理由,而「相信」有「外地人提供訓練」,請問呢點係咪「失實指控」呀林鄭月娥?啊,一定係香港人太反常,例如識用八達通入閘,唔會半夜去便利店買廁紙,更唔會買唔到廁紙,就學林鄭月娥搭的士去返第二度過夜!香港人,你哋實在太聰明啦!連特首都唔識用八達通,你哋識?



因此香港人如廁都一定受過外國訓練,等睇李家超講:「大家大便有不同味道,每次去大便都有特定的長度及縱深,認為如此有組織去大便,一定不會是烏合之眾」──啊,全港最大嘅烏合之眾上線啦!歡迎來到政府總部!



2. 醫管局高層就武漢奚肺炎威脅,提出可在72小時內,令「隔離病床」增加至1,400張。



根據我哋身邊嘅醫護朋友、去探訪病人嘅親屬,以及 HA secrets 所見,有理由相信,醫管局所指嘅「隔離病床」,係指a. 係病床隔離,開多張病床,果張就係「你隔離」嘅病床;b.你隻手一伸過隔離就有多張病床;c. 你隔離阿垃圾會議員何X妖中國博士入院,輕傷竟有得一間房隔離自己,再加一堆應送去堆填嘅垃圾;d. 以上都是。



3. 黑警在 Facebook 表示:「有網民發起如果喺某間公司賣廣告,就要抵制或追擊嗰樣產品,否則會向嗰間公司發動攻勢……呢種手法係黑社會常用嘅滅聲手法,佢哋向商戶施壓,脅逼佢哋就範,煽動仇恨,更加有機會犯法。」



唔通講緊日日數《蘋果日報》廣告嘅「國家領導人」梁振英?原來呢種手法係黑社會常用?我唔信,黑警陷梁振英於不義呀!冇陰功呀!



4. 又係梁振英,佢話「年輕人你們就是中國製造的,你們的父母也是中國製造的,你們的姓、名都是中文字,你們身體的水分主要是東江水,你們的官網只有中文,沒有其他文字,你們的錢包裡面肯定有中國銀行發的鈔票。」



UGL筆錢係400萬英鎊,唔係5,000萬港元,呢個係2016年當年梁振英嘅發言人馮煒光,在《都市日報》專欄大大聲教訓大家所講嘅!而英鎊上面嘅係英女皇,印製嘅係英倫銀行!梁振英是在英屬香港製造的,佢父親更是由由山東威海衞棄暗投明,來投奔英國人,甚至連個生個仔都要叫「振英」,而非「振中」;就讀嘅中學叫做「英皇書院」,而唔係「福建中學」。



由於梁振英出生於瑪麗醫院,組成其身體水份嘅食水,相信出自薄扶林水塘。而寫佢個名,「自古以來」都叫做漢字,包括日本人所寫嘅都叫漢字,而非「中文字」,在佢阿爸梁忠恩來香港嘅時候,即二戰前香港,當年只有漢文科,沒有中文科;更何況過千年嘅漢字,幾時被中國私有化?



再睇子女,梁家三子女都送去英國留學,2014年更利益申報太太有兩個「家庭居住」用途嘅英國物業,用梁振英嘅邏輯,「肯肯定」係英國人啦!



4. 梁振英篇文為乜?啊,批判黃色經濟圈;連登仔數過,近一個月來港共為咗佢地口心「幼稚」、「注定失敗」嘅計劃,竟然發動五十幾次「有不同角度的版本,每次行動都有特定的目標及劇情」,用來批判黃色經濟圈嘅文宣;根據比卡超嘅講法,呢種做法係有組織嘅部署,唔會係烏合之眾嘅所為,一定係「外地人」,即係「內地人」所提供訓練嘅行為!



比家超一定係搽咗天竺神油落個頭度,居然講真話呀!

-----------------------------

【壹週刊直播平台 ChannelNEXT】

全城抗暴 區區論壇同你深度剖析

立即睇



-----------------------------

【升級壹會員登記站 為你解疑難!】

親臨旺角做升級壹會員,即送「香港人:抗爭之夏」限量明信片

詳情地址