• 【寧關心森林大火】JaniceMan對香港事情隻字不提 網民批:真舐共都好過佢
  • 2020-01-10    

 

Janice Man文詠珊確係靚嘅,但佢多年嚟嘅言行都好容易引人詬病。近年明明喺香港已經少咗存在感嘅佢,近日又突然受到香港網民「關注」,話佢懶係大愛咩都關心、痛心,偏偏香港嘅事隻字不提,仲衰過「真舐共」嘅人。

呢位𡃁界女神自從2014年加盟太陽娛樂文化之後致力開拓大陸市場,喺香港嘅人氣反而大不如前,睇佢2019年結婚嫁人都唔多人講就知。

不過,最近有人提返起Janice Man,其實或多或少要多謝王晶,事關《倚天屠龍記之魔教教主》拍續集,而代替張敏演趙敏喺大都等張無忌嘅,有傳就係Janice Man。

竟然係Janice Man孭重飛?對香港觀眾嚟講佢或者有啲過氣,但對內地人而言佢形象相當「正面」,例如喺微博祝賀「祖國生日快樂」呢啲濕濕碎啦。比其他人有過之而無不及嘅係,佢連乜鬼嘢「八一建軍節」、「微博十歲生日」、「葉問票房報捷」,通通寧舐錯莫放過,甚至老公仲係紅三代添,無乜邊個比佢更有「資格」做女主角。

何況,佢嘅正面關愛所及之處,遠至為台灣高以翔猝死、亞馬遜森林大火而心痛,兼喺IG出post,偏偏對自己土生土長嘅香港現況視若無睹。唔係話佢企咩立場,而係佢好似當無事發生咁不聞不問、隻字未提,呢點亦係香港網民所不齒嘅地方,明言:「真舐共撐警都好過佢假知性,起碼人哋立場明確。」

「知性」嘅人,往往有種「知識豐厚底蘊」感覺。Janice Man讚好「八一建軍節」,唔知佢又知唔知,其實即係南昌起義,又名南昌暴動,而「暴動」呢個定性又恰恰係中共自己承認呢?斷估講出四川大地震懲罰論,又有JM Tone嘅佢未必知。

-----------------------------

【壹週刊直播平台 ChannelNEXT】

全城抗暴 區區論壇同你深度剖析

立即睇



-----------------------------

【升級壹會員登記站 為你解疑難!】

親臨旺角做升級壹會員,即送「香港人:抗爭之夏」限量明信片

詳情地址