• 【18歲始炒股】買中國平安賺過百萬 銀行借錢開車仔麵:其實煮麵比較實在
  • 2020-01-07    

 

一個小伙子,在茶餐廳內忙東忙西,第一眼以為他是普通茶餐廳夥計,但原來年紀輕輕的他才是老闆。九十後的陳兆秋(Sean),現時擁有五間食肆,包括「囍記車仔麵」及「囍運冰室」,計劃將來開第六間分店。「因為我覺得一是不做,一是就全心全意做大點做得有規劃一點。」他本身是潮州燒臘店太子爺,但他創業的資金,很大部分來自炒股並且使財技,盡顯李嘉誠同鄉潮州人掘金有道本色。

中學暑假全天候炒股


「個時貪靚,想買衫,又唔想成日問爸攞錢,咪要諗下點樣搵錢。」他一到了十八歲,就去開股票戶口。他憶述那時為了趕及銀行5點關閉前去到,約4點放學後便衝至銀行排隊,表示要開股票戶口那刻,職員見他仍身穿校服,驚訝道:「𡃁仔你夠秤未?」 人生買的第一隻股票是I.T. (999),當時他去時裝店I.T.打暑假工,觀察到生意興旺,「一日可做十幾廿萬生意,好犀利、好誇張!」

「我記得睇過本書話,與其你嘥錢去買佢嘅產品時,不如你用啲錢買佢間公司。嗰陣時啲股票好平,幾毫子,買咗個零兩個月,之後佢出業績,原來增長、turnover(營業額)多咗五倍!突然間全世界都望住呢間公司,炒上好多,去到個幾兩蚊。嗰陣時銀碼唔係好大,但係俾咗個概念我,原來可以咁樣去做。」I.T.股價處於最低位0.35元之際是2008年10月,那年Sean正正是18歲,翌年底就升穿1元,又趁跌勢時沽出。

為他帶來「和味」收入的是中國平安(2318),他在股價三十多元時買入約兩萬股,至今升三倍到九十多元,帳面賺約百二萬元。「隔咗兩年睇返,無啦啦變左百幾萬,都幾好,又唔使點樣經營。」他的另一愛股中國恆大(3333)股價亦升五、六成。因此,在Sean眼中,中環是一個生金蛋之地,「嗰陣時睇新聞做一單deal、做一單trading,好多好多錢,天文數字!」不過他強調自己並非專業股評人,靦腆地說:「唔好提咁多股票嘅嘢。」

Sean一個暑假去打工,另一個暑假沒去工作,卻在家中初試炒期指,「八點鐘咁上下起身睇一睇,事前早啲準備,嗰陣時做啲day trade, 然後去到晏晝休市食飯, 4:30咁上下停,好似完咗一日嘅工作,但係嗰刻真係好攰,日日都要用大概八、九個鐘。」後來Sean考進了英國名牌大學University of Leicester (萊斯特大學),順理成章攻讀金融相關學系。

炒股賺錢開5間餐廳


不過,在股海中屢戰屢勝的Sean,開始覺得對金錢世界感到厭倦,「有其他空閒時間你唔知點樣,你嘅人生都想豐富啲㗎嘛。」爸爸經營燒臘店已廿十年,近年生意一般,萌生退休念頭,問Sean想不想接手。從小在燒臘店長大的Sean,對這間老店也有感情,於是二話不說就接手。

Sean眼見大學同學們在金融界撈得風生水起,也有質疑自己的時刻,「讀咗咁多年書,走來做餐廳,咁讀黎做咩?」接手食肆,原不在他的計劃藍圖之中,「諗住起碼出到嚟最少都着套西裝,喺Office返工,好似企企理理咁樣。」既然已繼承了父業,Sean決定就算做「廚房佬」,也要將生意做得有聲有色。茶餐廳及車仔麵店予人「地痞」、舊式感覺,Sean想到將餐廳注入新潮元素,例如在室內增設一些予人「打卡」的霓虹燈燈箱,以吸引更多年輕人來光顧。

他也不忘使出財技壯大生意。他不時到較相熟的一間銀行打轉,好幾次都真的借錢走,銀行職員忍不住問他:「𡃁仔,又係你?你借咁多錢做咩?」更勸他不要太心雄。他淡定道,「我話我計數啫,我計得掂數,多多我都肯借!」Sean打開算盤,就當開一間有一定規模的店舖,需花五、六百萬元成本,向銀行借錢,利息即hibor 加1.3左右,總共約兩厘幾。他屈指一數,若然投資回報多於兩厘,甚至去到四、五厘,就能夠賺取當中的息差。「時間是我的本錢。」如今只是29歲的他,計劃資金最長可借三十年,目標是賺5%息差,少則賺2至3%息差。

Sean有感營運一盤生意,會與不同人接觸、交際,不時發現原來「天外有,天人外有人」,「對住股票你喺度住一個死物,你唔需要同佢講任何野,變咗做做下你都好似一個機器。做一啲實業,你真係煮碗麵出來,抬去畀食客,你會有好實在感覺,唔會好虛無飄渺。」

撰文:邱嘉幸

攝錄:林志謙

-----------------------------

【壹週刊直播平台 ChannelNEXT】

全城抗暴 區區論壇同你深度剖析

立即睇



-----------------------------

【升級壹會員登記站 為你解疑難!】

親臨旺角做升級壹會員,即送「香港人:抗爭之夏」限量明信片

詳情地址