• 【2020 職場預言】6 大打工新趨勢|張慧敏
  • 2020-01-05    

 

2019 已經過去, 2020 現在開始,幾時都話要未雨綢繆,居安尚且要思危,何況身處動盪不安的大時代?今時今日,真正今時唔同往日,沿用過時舊思維,是應付不了未來新挑戰的。

新的一年新開始,先為浮沉職場的各位送上大禮一份。我特別請來猛人:香港科技大學Career Center trainer & Career Advisor 專家 Grace,以個人經歷加專業知識,為大家把脈兼預測一下未來職場趨勢。

今時今日,人生再無得規劃。有腦嘅,可以放低上一代賴以生存的舊公式;有腦但唔想用嘅,可以照抄繼續食老本,各自修行。

今時今日, 職場仕途更加無得規劃。有腦嘅,懂自省嘅,用家市場、靈活變通、多元職業,總有一個工作模式啱你;但係有腦又唔想咁用嘅,入大公司樹大遮蔭唯命是從也可。

現世最危險係:一人只有一個夢想,同埋太沉醉於安穩,自我溫水煮蛙。都係嗰句:一世人流流長,唔好太滿意、唔好麻木,你有得揀。

我一把年紀,上有高堂、下有子侄都 Slash Career 啦,你唔係淆底下化?

以下六大職場預言,我敢寫包單必定言中,加埋分析如下,咪話唔贈你:

1. 有正確態度及高強毅力者,學歷/GPA 無所謂

識讀書不如識讀人,識做事不如識做人,這兩句說話經得起時間考驗,且放諸四海而皆準。待人接物技巧,讀幾多年書都讀不來。老闆請人,看重的不是那一張個個都有的所謂大學畢業證書,要的是肯學肯做肯返工的人。如果加上識問問題,經已是個人才!

2. CV/Cover letter 會越嚟越唔重要

千篇一律的履歷,抄來抄去的 Cover letter,寫的求其看的隨意,浪費時間實際上是浪費大家生命。學歷不如能力,高度不如態度,做過甚麼比讀過甚麼更重要,更有賣點。

3. 工作再無JD (Job Description)

員工合約上寫的標準工作時間,大家還會信嗎?自己份工靠自己 describe,result oriented + driven,最緊要做好件事,冇乜嘢叫做唔關你事。

4. 面試唔再係「面試」

如果只係想見面,無需花時間舟車勞頓,網上幾時都可以見面。如果雙方都有誠意願意約時間約面對面傾,就不再是面試,是雙方的期望管理。

5. 成功不一定係升職

實話實說,的確有不少人講到明拒絕接受「被升職」,因為只是職位升了,人工的升幅絕對跟不上工作量和壓力的加幅。最重要是工作有沒有令自己進步及發揮的空間,練得一身好本領,你使驚冇運行搵唔到好工?

6. 升咗職唔代表穩定

在一個以光速運行「變幻才是永恆」為真理的世界,以不變應萬變,是自尋死路。升職是好事還是壞事,兩睇,但如果抱着坐定粒六的心態,那只是搵定而不是穩定,好快就會被淘汰需要再去搵工。

張慧敏 (Alison),人稱 Son姐,從「獵頭女王」成功轉型成為商企顧問公司CEO,由始至終的專業是憑一對慧眼看盡職場大小疑難雜症。正職是一對兒女的母親,從自身挫折和經驗悟出教養之道,不外乎以身作則。

個人Facebook 專頁:

https://www.facebook.com/HKcareerdoctor

-----------------------------

【壹週刊直播平台 ChannelNEXT】

立即睇

全城抗暴 區區論壇同你深度剖析

-----------------------------

【升級壹會員登記站 為你解疑難!】

親臨旺角、銅鑼灣做升級壹會員,即送「香港人:抗爭之夏」限量明信片

詳情地址