• 【非攻】澳門(黃秋生)
  • 2019-12-23    

 

細個嗰陣,屋企人帶埋我過大海,嗰時覺得澳門好落後,同六、七十年代嘅西環差唔多,一街戰後樓、一陣霉臭味、夜晚烏燈黑火,淨係得葡京附近有啲光,照住啲滿面黑氣嘅賭鬼。

大人去賭兩手,買下「狗仔」,嗰陣屋企人都冇乜錢,印象中魚翅都未食過。嗰時細路都可以帶入賭場,我悶到死。大三巴有乜好睇?嗰陣連射燈都冇,所以一定係日頭去,喺小朋友眼中,廢墟一個!嗰時唔知地底有寶藏。

返香港前就買下牛肉乾、豬肉乾,都唔知有乜好去。大個啲嘞,同契爺去過一次,仲坐船仔過咗大陸,嗰陣大陸啱啱開放,契爺想睇下同啲個體户有乜生意好做,仲問我意見,我識鬼咩?見到煮大鑊飯個大鑊都知大鑊啦,早知叫佢起樓啦!睇完一輪夜晚返去澳門,喺街邊食咗個粥做宵夜,好鬼好食,不過周圍又係烏燈黑火,返香港前又係買下牛肉乾呀、豬肉乾呀咁,又係唔知有乜好去。

再大啲,入咗行,揾到啲錢,又咁啱有個老友過咗澳門定居,有支盲公竹,於是去多咗。嗰陣覺得澳門、台灣、日本係旅遊金三角,賭場多咗幾間,酒店又唔貴,平過香港仲有折,最貴係 Bella Vista歐陸建築,得十幾間房,一行入大堂,對皮鞋喺地板上敲出「咯咯咯」嘅聲音,仲喺空曠嘅大堂中聽到響亮嘅回音,頓時覺得自己成個貴族咁。

而家冇啦,收返做領事館啦。

移交前仲有好多特色餐廳,葡國人開嘅葡菜、土法柴火飯、黑沙嘅意大利餐,又有人帶路,又有車,賭下、食下又住下,氹仔路環都未發展,莫講話横琴,人又少又舒服,澳門好似一個帶有波希米亞風情嘅亞洲美女咁,值得望多兩眼。雖然都係冇乜文化,書局得一間。

明嘅,賭仔最怕書。

到回歸前夕,打到飛起,又劈友、又炸彈、又燒車、又開槍暗殺,不過一定唔係因為政治,因乜我就唔知嘞,反正唔係好敢去。移交後,大局已定,安全咗。去過拍戲,去過電影節,去過學空中飛人。

横琴都發展埋,好多大酒店,又漁人碼頭又威尼斯呀咁,成個横店咁。不過冇咗 Bella Vista,冇咗歐陸風情、冇咗柴火飯、冇咗葡國大媽嘅木糠蛋糕,連大三巴地底個寶藏都冇埋。金碧輝煌,好庸俗。又係賭下錢呀,買下豬肉乾、牛肉乾呀咁,每年好似有個電影節搞得幾好,我朋友幫手搞嘅(認下叻)。

咁多年,都係賭下錢、撳下腳,有可能仲嫖下娼、豬肉乾、牛肉乾。你話澳門可以替代香港?揾鬼信!起多兩間酒店就國際都會?得嘅,上海做咗啦!有金融買賣就國際金融中心?係嘅上海做咗啦!法制呢?人才呢?教育呢?文化呢?最重要嘅係,信譽呢?你要國際認同先得㗎,開間公司叫國際乜乜就國際咩?真係以為香港嘅地位可以喺幾年建立?真係認為喺香港放一萬幾千個催淚彈,香港就玩完?真係覺得拉幾千人,香港就冇人才?香港連衰人都傑出過人,有光嘅地方就有希望,有勇氣嘅地方就有人才。香港人,人才多,奴才少。



作者簡介:

黃秋生,字秋生、號秋生哥、影帝、黃哥、黃老師⋯⋯等等。香江灣仔人也,生時,毫無異象,亦無大蛇入屋,只見呱呱墜地,肥肥白白。時值仲秋,因而為名。幼時,頑劣不堪,教而不善,精力過人,常上山下海,破壞王也。未冠,變本加厲,不學無術,言不及義,好行小慧,目中無人。秋少負氣節,立志遠大,唯願終生無所事事,游手好閒,不勞而獲,好食懶飛。及後,竟因緣際會,負芨演藝學院。風起雲湧數十年。到如今,千帆過盡,一事無成,落花流水春去也。唯一生愛看書,雖不求甚解,無立德立言,然亦未作低三下四,奴顏婢膝之事。足以慰平生,曰:人也!

-----------------------------

【壹週刊直播平台 ChannelNEXT】

全城抗暴 區區論壇同你深度剖析

立即睇



-----------------------------

【升級壹會員登記站 為你解疑難!】

親臨旺角做升級壹會員,即送「香港人:抗爭之夏」限量明信片

詳情地址