• 【非攻】語錄奇文共賞(黃秋生)
  • 2019-12-11    

 

最近睇到一篇奇文,想同大家共賞。

奇文嘅内容係關於反對使用繁體字,内文有句尤其觸目驚心:「用繁體字的人是漢奸。」 嘩!真係罪大惡極,天理不容。原來中國人列祖列宗都係漢奸,以前未有簡體字,咁即係 ── 用中文的人都是漢奸?

我哋觀賞一下部分充滿偏見嘅内容先:「 一旦政府真的採納了某漢奸走狗的繁體字提案⋯⋯中國立即就會有過半的人口會跌入文盲半文盲的悲慘處境。」呢條友啲中文真係屎到爆,小學二年班生都好過佢。

首先我唔明點解一採納,都未實施,就會立即有過半人口跌入文盲半文盲(四分一文盲,三點六四七五文盲。你話呢啲中文係咪除褲痾屁?)嘅處境?我又唔明點解提倡繁體字( 正宗漢字)會係漢奸?唔通佢認為繁體字唔係漢字,係拉丁文?作為漢奸,首先一定要係漢人,然後要有國可賣,因此必須要有買家。提倡中國人用中國沿用千年嘅正統繁體字,漢乜嘢奸?唔通佢嘅漢同其他華人嘅漢有所不同?唔係講緊同一個漢?

你當然可以話簡體字比較容易學,書寫比較快,但係跟漢奸唔漢奸,真係扯唔上關係,有啲人就係咁,一同自己意見唔同,就扣人一頂民族主義大帽子,唔同意我嘅都係漢奸。

用繁體字會令過半人口跌入文盲半文盲處境?咁港、台人民咪全部文盲半文盲/三份一文盲?

後文佢提出理據話:「人民忙於溫飽尚且不得閒,哪來的時間來玩什麼高深的繁體字藝術。」第一句唔明,乜嘢忙於温飽尚且不得閒呀?即係連揾食、食飽都唔得閒呀?咁忙呀?忙乜呀?有時我真係認為寫呢種爛中文嘅唔係中國人。

魯訊話:「一要生存,二要温飽,三要發展。 」唔得閒温飽即係仲停留喺生存階段,但係而家中國唔係已經到咗高度發展階段咩?整乜又會忽然間返咗去生存階段?我同意繁體字高深,唔係個個人都可以將佢變成藝術 ── 即係咁,人人都識行路,但係唔係個個都可以行到好似劉德華咁有型一樣。

擔心嚟都係多餘嘅。高深係文字本身嘅内涵,唔係佢嘅學習難度,若肯學,兩三歲嘅細路都可以流利運用繁體字,只要唔係先要生存而「不得」── 正確用法喺咁嘅,不得後係冇個閒字的,不過條友爛醒,得後加個閒字,意思變成九唔搭八,畫蛇添足。

可以接受基本教育,正常智能都可以學好繁體字,可能喺佢眼中,大陸有一半人口都冇正常智能,或者求温飽而不得閒,正在忙於求生存吧。

奇文太長,空間不足以全解,如果反應好,下次再續。

人在異鄉,仍願香港安好,警察精神病患盡快康復。



作者簡介:

黃秋生,字秋生、號秋生哥、影帝、黃哥、黃老師⋯⋯等等。香江灣仔人也,生時,毫無異象,亦無大蛇入屋,只見呱呱墜地,肥肥白白。時值仲秋,因而為名。幼時,頑劣不堪,教而不善,精力過人,常上山下海,破壞王也。未冠,變本加厲,不學無術,言不及義,好行小慧,目中無人。秋少負氣節,立志遠大,唯願終生無所事事,游手好閒,不勞而獲,好食懶飛。及後,竟因緣際會,負芨演藝學院。風起雲湧數十年。到如今,千帆過盡,一事無成,落花流水春去也。唯一生愛看書,雖不求甚解,無立德立言,然亦未作低三下四,奴顏婢膝之事。足以慰平生,曰:人也!



-----------------------------

【壹週刊直播平台 ChannelNEXT】

立即睇

全城抗暴 區區論壇同你深度剖析

-----------------------------

【升級壹會員登記站 為你解疑難!】

親臨旺角、銅鑼灣做升級壹會員,即送「香港人:抗爭之夏」限量明信片

詳情地址