• 【非攻】語錄(黃秋生)
  • 2019-12-02    

 

前兩日有個朋友 send 咗篇嘢比我睇,内容係一堆語錄,標題係話,如果以後有人同你講任何以下嘅語錄内容,基本上可以唔駛同佢浪費口水咁話。

我向來習慣講道理,有時都會唔啋人,但係絕對同立場與信仰無關,而係因為佢面相話我知:佢低低哋,智能有限,廢事對牛彈琴。青春有限,時候無多,直入正題,同大家睇下呢啲精彩片斷先。

「美國佬喺背後搞事。」

佢真係知道美國佬喺背後搞事?係一個美國佬定好多美國佬呀?定係美國政府呀?有冇證據㗎?有證據做乜唔報官呀?知情不報罪加一等喎。如果冇證據做乜狗噏呀?尋釁滋事喎。

如果美國佬真係喺背後搞事,咁出手實在太低啦,前綫全部用中世紀武器、磚頭、雨傘,最高科技都只不過係莫洛托夫雞尾酒,聽個名就知蘇製嘅,功夫龍頭盔都冇一頂,M 16都冇一支,美國佬真係流口水。

「黃之鋒係港獨分子。」

佢係咪港獨分子我就唔肯定,不過我好肯定自己唔係港獨分子,但係就畀佢哋話係,所以我都懷疑黃之鋒係唔係,其實我都非常好奇,港獨喺佢哋嘅理解中係乜嘢定義,好可能有反對聲音嘅就係港獨,有香港身份證嘅又係港獨,話一國兩制嗰個其實係最大嘅港獨,最近我發現,點解咁多港獨,因為有人製獨 ── 製獨分子。

「示威者一定收咗錢。」

從文法睇嚟,呢句係估嘅。如果肯定有人收錢,呢句應該係:「示威者收咗錢」就好似話啲藍絲出嚟係收咗錢一樣,冇人會話啲藍絲「一定」係收咗錢,因為佢哋除咗畀人影到之外,最近仲有個藍絲谷話:「我哋今次就唔收錢遊行一次。」呢啲咪我講嘅低低哋囉。

「冇犯法驚咩俾人拉。」

問題係:冇犯法,做乜要俾人拉? 我懷疑你衣服内綁住炸彈,你除哂啲衫褲比我睇下,你冇炸彈怕乜除衫比我睇呀?

「民主唔可以當飯食。」

班友除咗食飯之外,人生仲有冇其他追求?生存目的係為咗生存,食飯係為咗可以食下一餐飯,貓狗都唔只咁本能嘅要求啦,真係畜生都不如。

「喺外國一早開咗鎗。」

講到自己好似好熟外國咁,邊度外國呀?北韓呀?又美國呀?亂咁開鎗要負刑責㗎,睇下「外國」啲新聞啦,咁熟外國,其實只係跟團去過一次日本,兩次菲律賓,經常返大陸食海底撈咋。

「唔鍾意咪移民囉。」

咁佢而家一定好鍾意香港嘞,如果唔鍾意,佢做乜又唔移民呢? 成日話愛乜、愛物,唔鍾意就走,唔去改善佢,為香港付出,呢種態度,去到邊都係失敗嘅逃兵。

「打爛啲玻璃好暴力。」

打爛玻璃暴力,定打爆眼暴力?問佢情願比人打爛手機定打爆佢個頭?唔好淨係睇到爛玻璃而睇唔到斷手斷腳噃。

不過咁,咁講得都係低低哋。對牛彈琴。



作者簡介:

黃秋生,字秋生、號秋生哥、影帝、黃哥、黃老師⋯⋯等等。香江灣仔人也,生時,毫無異象,亦無大蛇入屋,只見呱呱墜地,肥肥白白。時值仲秋,因而為名。幼時,頑劣不堪,教而不善,精力過人,常上山下海,破壞王也。未冠,變本加厲,不學無術,言不及義,好行小慧,目中無人。秋少負氣節,立志遠大,唯願終生無所事事,游手好閒,不勞而獲,好食懶飛。及後,竟因緣際會,負芨演藝學院。風起雲湧數十年。到如今,千帆過盡,一事無成,落花流水春去也。唯一生愛看書,雖不求甚解,無立德立言,然亦未作低三下四,奴顏婢膝之事。足以慰平生,曰:人也!

-----------------------------

【壹週刊直播平台 ChannelNEXT】

全城抗暴 區區論壇同你深度剖析

立即睇

-----------------------------

【升級壹會員登記站 為你解疑難!】

親臨旺角做升級壹會員,即送「香港人:抗爭之夏」限量明信片

詳情地址