• 【老巴刹得兩枱客】廚房佬怕岳少包完即棄
  • 2019-11-29    

 

與林鄭同屬「雞」的岳少-林建岳,係林鄭上場後榮升為貿發局主席,代表香港對外尋找商機,不過Donald Trump簽埋《香港人權與民主法案 》後,岳少呢份公職都唔係好好撈。兼且私人嘅高級食肆生意都大受影響,都咪話唔頭痕。林鄭就話「針唔拮到肉唔知痛」,岳少旗下食肆伙記簡直「一針見血」。小宗見位於灣仔「重災區」嘅老巴刹,晚飯都只得兩枱客,個大廚Billy牙痛咁聲櫈老細岳少肉痛之餘,見著晚晚水静鵝飛也心知可能「命不久已」。有個熟客 得悉惨况特意來撐場,勉強兩條友食都叫足四人份量,最多打包拎走。呢位熟客說:「咁就要call齊啲老友整多幾餐,如果唔係,第時有錢都冇得食。」

Billy大廚亦冇欺場,特別整個焗大閘蟹蓋,唔使用手拆蟹,又食到膏、又食到肉,果然惹味。呢位熟客又再獻計,叫大廚去申請李嘉誠中小企支援基金,謂有六皮嘢,話晒岳少都係潮州幫「格己冷」嘛。大廚反應奇快: 「有冇搞錯呀? 咁咪好無面?」老巴刹好景之時,獲城中不少名人及銀行家幫襯,一條馬來西亞的「忘不了」河魚起碼過萬,客人開嘅紅酒Lafite 、Petrus、Romanee Conti, 十萬八萬一支都面不改容。岳少近十年都搞咗唔少「響朵」嘅食肆如位於金鐘「好酒好蔡」、中環嘅「九号館」; 都「包起」唔少城中名廚,似得Billy 識得同老細諗嘅,段估都冇咁易被老細「飛」啩。

撰文:宗菁華