• 【禁忌之林】美國佬的制裁(林忌)
  • 2019-11-29    

 

西環──建制派的大佬A 與B,在一間藍到發紫的高級中菜館撐檯腳。

「大事不妙!美國人不依本子辦事!通過《香港人權及民主法案》了!你說怎麼辦?你說怎麼辦?你說怎麼辦?」建制派的大佬A忍不住問

「唔使驚!你行得正企得正,身冇屎,怕咩惡法?呢個世界邊有惡法?邊個叫你唔守皇法?」B一臉忠貞,彷彿那座人肉錄音機說。

「蠢才!今次不是影響班賤民,係影響你同我呀!唔單止在美國的資產可能被充公,去唔到美國讀書探朋友,甚至連在香港開個銀行戶口都可能受阻呀,你話邊有咁惡呀!」A一陣腳軟,仿似聞了Teargas般眼濕濕說。

「冇理由!早兩日我明明聽姓陳嗰個禿頭佬講,話要投建制派票,令建制派大勝,美國先會通過條法案,搞乜鬼建制派輸到甩褲,都居然照過?我諗唔通呀!」B指住手機上一個禿頭佬的Facebook問。

A 一臉驚訝,提高聲線問:「喂亞哥,嗰堆說話係用嚟呃白票黨班傻佬,係用嚟呃班飯民射落海咋,唔係連你自己都信呀?」

「我都以為呢個世界冇人咁蠢,但係之前咁多年,年年都有人話要杯葛功能組別,話要杯葛小圈子選舉嘛!總之每次選舉就搵人狙擊下飯民,呃班道德佬講原則,叫人唔好投不義的選舉,叫自己講原則就要射落海!咁我哋咪坐定粒六贏,贏到2047囉!」B忍不住嘆氣,望著樓下黑衫人的標語「不割席」三隻字,彷彿在緬懷昔日的好時光。

「班飯民以往又真係蠢過隻豬,只要搵堆五毛施壓,班友就成日同班後生仔割席,又簽咩聯署聲明,偏偏今次卻唔中計,叫極佢哋同暴力劃清界線都冇反應。」

A越諗越唔忿氣,有如「何已完」般雙掌怒拍檯面說:「明明班暴徒都好蠢,阿爺派人四圍放火,自己打爛港鐵設施,熄晒交通燈,班暴徒居然驚死唔知係佢哋做,邊有賊殺人放火仲要公告天下先?連唔係佢哋做都要自認,驚死人哋唔同佢哋割席!我仲諗住今次發達啦,班沉默大多數一定會企出嚟撐我哋!」

「點知一個二個都輸X晒!粗口娟的預言成真!嗰個林鄭搞咩條例衰咗,就拉我哋陪葬!又話民意逆轉?鬼有逆轉呀!何已完心口中刀咁激,都救唔到選情!隻北極企鵝作為明日新星,點知都係輸!鼎!我冇諗過連咁多新移民住水X澳,嗰個杏家丟都輸埋,丟!」A垂頭喪氣哋埋怨,彷彿似希特拉在地堡中哀嘆戰敗的表情。

「鬼咩,為咗保住琼子,所有後備兵源都去晒保住佢!但係我都冇諗到,可以成個港島輸到得返一席,嗰個咩『拍假山清霞』,仲好風騷咁在Facebook 自貼邀功,話諗唔到成個盲賤聯在港島得返一個區議員,真係好想叫元朗班友打佢一身。」B自怨自艾,唔理胃鯨吞了半隻燒豬。

「咁阿爺而家點呀?想換個衰婆落嚟,又驚班商家佬作怪,區議會落馬的102個議員,明年一月就喪失選委身份,一定畀泛民搶晒;唔換,繼續由個衰婆做,明年立法會我哋唔使選啦?」A苦苦思索說。

「唔怕!基本法45條寫『特首在當地通過選舉或協商產生』!使乜搞選舉,叫人大又釋一次法,由北京直接換特首,咪唔使驚輸囉!」B懶醒地說。

「比起條八婆做,又搞釋法到時阿爺叫你同我硬撐,到時美國真係沒收晒我哋海外資產,搞到我哋仔女都冇得在美國讀書,然後連銀行戶口都開唔成,就真係世界末日啦,我理得條八婆係生係死,定邊個做呀,我都要學粗口娟!依家喊有咩用?你識喊!我都識喊!」說罷,A 與B同聲一哭,流下了男兒淚。

-----------------------------

【壹週刊直播平台 ChannelNEXT】

立即睇

全城抗暴 區區論壇同你深度剖析

-----------------------------

【升級壹會員登記站 為你解疑難!】

親臨旺角、銅鑼灣做升級壹會員,即送「香港人:抗爭之夏」限量明信片

詳情地址